KNR juullimut inuulluaqqussutinik amerlanernik aallakaatitsissanngitsoq
DR-ip nunatsinut juullimut inuulluaqqusinera aallakaateqqinneqassangitsoq nalunaarutigineqareersoq inunnit qisuariarfigineqarlualaavippoq.
KNR-ilu -nunatsinni tamanik kiffartuussisutuaalluni- juullimut inuulluaqqussummik aallakaatitassiussanersoq inunnit arlalinnit apersuutigineqarpoq.
KNR-ilu aallakaatitassiorsinnaanissaminut akuersisimanissaa naatsorsuutigisimagaanni pakatsinarluinnartuussaaq.
- DR-itut annertutigisumik suliaqarnavianngilagut, KNR-imi pisortaq Annga Lynge oqarpoq.
- Taamaattorli uagut ukiut tamaasa aallakaatittagarput KNR-ip isiginnaartartunut tusarnaartartunullu juullimi pilluaqqussutaa, taanna ingerlatissavarput, taanna oqarpoq.
Ileqqut allanngortinneqassanngitsut
Taakku saniatigut ‘Inuit juullimut inuulluaqqusinerat’ Vejlemiit aallakaatinneqartartoq decembarip aallartisimalaarnerani aallakaatinneqassasoq Annga Lynge oqaluttuarpoq. KNR-i taamaalilluni ileqquni attatiinnarlugit aallakaatitsisassaaq.
- KNR-ip isiginnaartartunut tusarnaartartunullu inuulluaqqussutaani aamma Danmarkiminngaanniit ilanngussaqarumaarpugut, Annga Lynge oqarpoq.
DR-i unitsitsinermini eqqortumik aalajngiisimanersoq, KNR-imi pisortap sunniuteqarfiginnginnamiuk oqaaseqarfigisnnaanangulu isummerfigisinnaannginnerarpaa.
Aallakaatitassiat ineriartortinneqarsinnaasut
Aallakaatitassiaq ‘Julehilsen til Grønland’ ukiuni 100-jungajanni aallakaatinneqartarnikoq, ullutsinnut naleqqukkunnaarmat aallakaateqqinneqassanngitsoq DR-ip ilaatigut tunngavilersuutigaa. Annga Lyngelli ineriartortitsinissamut periarfissiisutut isigaa.
- KNR-ip juullimi pilluaqqussutaa taanna ineriartortinneqarsinnaavoq, kisianni massakkoqqissaaq pilersaarutaareersut malillugit suliaanera allanngortissinnaanngikkallarparput, taanna oqarpoq.
Naak KNR-i amerlanerusunik juullimut inuulluaqqusissutinik aallakaatitsinialersaanngikkaluartoq, kalaallit peqatigiiffiisa kattuffiata 'Inuit' aaqqissugaanik Vejlemit nunatsinnut decembarip arfineq aappaani inuulluaqusilerpata toqqaannartumik aallakaatinneqassasoq.
KNR-illu isiginnaartartunut tusarnaartartunullu juullimut pilluaqqussutaa Katuamit toqqaannartumik decembarip 15-iani aallakaatinneqassasoq taakkulu isiginnaarneqarsinnaasut, Annga Lynge naggasiivoq.
