Múte B. Egede: Danmarkip spiralilersuisimanermik qulaajaanissaq paamaaruppaa

Spiralilersuisimanermik qulaajaanissamik suli aallartitsisoqannginnera Naalakkersuisut siulittaasuata isornartorsiorpaa. Tamanna ilisimasaqarluartunik naammattunik suli qulaajaasussarsisoqannginneranik peqquteqartoq, DR allappoq.

Allattoq Helle Nørrelund Sørensen

maajip 22-at 2023 11:47

Nutserisoq Hanne Petersen

- Naammagittarneq tamaanga killeqarpoq.

Naalgaaffiup spiralilersuisimanermik qulaajaanissamik paamaarussinera isornartorsiorlugu Naalakkersuisut siulittaasuata, Mute B. Egedep, Facebookimi allataa taama aallartippoq.

- Danskit nunatsinni kusanaatsuliaasa ilaat, spiralilersuisimaneq taassumalu qulaajaaffiginissaanut ukiaq isumaqatigiissutaasup aallartinnissaanut, nunatsinniit ilungersoraluarluta danskit paamaarussipput. Tamanna akuersaanngilluinnarpara, Múte B. Egede ilaatigut allappoq.

Spiralilersuisimanermik maanna qulaajaasoqalereersimasussaagaluarpoq, qulaajaanermilu paasisat 2024-mi oktobarip aallaqqaataaniutinnagu tunniunneqareersimanissaat pilersaarutaagaluarluni. Tamannali angumerineqannitsoorpasilerpoq.

Aamma atuaruk Sara Olsvig spiralilersuisoqarnera pillugu: Aaqqissuussamik innarliisoqarnera ullumikkumut qanoq sunniuteqarnersoq misissortariaqarparput

Arlaannaannulluunniimmi attuumassuteqanngitsunik qulaajaanermik ilisimasaqarluartunik suli toqqaasoqanngitsoq, nutaarsiassaqartitsivik DR allappoq. 2023-p aallartinnerani toqqaasoqassasoq, Danmarkip peqqissutsimut ministereqarfia DR-imut 2022-mi decembarimi ilisimatitsivoq.

Qulaajaanissamik aallartitsinissaq ataasiaannarnatik nukingisaarutigisimagitsik, Naalakkersuisut siulittaasuat Múte B. Egede oqarpoq.

- Qulaajaanermi ingerlanneqalereersimasussaagaluarpoq. Suliaq piaarnerpaamik aallartittariaqarpoq. Minnerunngitsumik arnat akuersaarneqarsinnaanngitsumik pineqarsimasut pillugit, taanna Facebookimi ilaatigut aamma allappoq.

Qangali nukingisaarutigigaat

Qulaajaanissap aallartinnissaa Naalakkersuisut qangali nukingisaarutigigaat, peqqissutsimut naalakkersuisoq Mimi Karlsen (IA) oqarpoq.

- Piaarnerpaamik qulaajaasoqarnissaa Danmarkip naalakkersuisuinut nukingisaarutigiuarparput. Folketingimut siorna qinersinerput kingornalu naalakkersuisoqatigiiliorniarneq kinguaattoornermut peqqutaapput, Mimi Karlsen KNR-imut akissummini allappoq.

Kalaallinik qulaajaasoqaqataanissaa Naalakkersuisut pingaartikkaat, Mimi Karlsenip aamma ilisimatitsissutigaa.

- Oqaluttuarisaanerput, kulturerput nunattalu inui ataqatigiinnerat eqqarsaatigalugit kalaallinik qulaajaasoqaqataanissaa pingaarpoq, kalaallinimmi arnanik spiralilersinneqarsimasunik oqaloqateqarnissami aamma pisariaqartutut aamma isigineqarmata, Mimi Karlsen KNR-imut allappoq.

Aamma atuaruk Arnat qulingiluat akuersitinneqaratik piffissami kingusinnerusumi naartunaveersaaserneqarsimanertik naammagittaalliutigaat: - Ajuusaarnaqaaq

Ilisimatusartoqatigiinnik qulaajaasussarsiornermi Den frie Danske Forskningsfondimit aamma Nunatsinni Ilisimatusarnermik Siunnersuisoqatigiinnit nalilersorneqaleruttortut, Mimi Karlsen ilisimatitsivoq.

Kinguaattoorneq Danmarkip peqqissutsimut ministeriata, Sophie Løhdep (V), ajuusaarutigigaa, DR allappoq. Kinguaattoornerli Folketingimut novembarimi qinersinitsinnik taavalu arlaannaannulluunniit attuumassuteqanngitsunik, soorlu peqqissutsimut tunngasuni inatsisilerituumik, ilisimasaqarluartunik qulaajaasussarseriaannaannginnermik peqquteqartoq, Sophie Løhde oqartoq DR aamma allappoq.

- Folketingimut qinersinerput allanngortissinnaanngilara, naammattunillu piukkunnartunik qulaajaasussarseriaannaannginnerput aamma allanngortissinnaanngilara, Sophie Løhde DR-imut oqarpoq.

Qaammatip massuma ingerlanerani naammattunik qulaajaasussarsissangallutik, taanna DR-imut aamma oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.