Aaja: Danmarkimut isumaqatigiinniarnerni nunatta soqutigisai sianigineqartariaqarput
Kim Kielsenip Lars Løkke Rasmussenillu ataasinngormat isumaqatigiissutigisaat tunngaviatigut nunatsinni ineriartortitsinermut pitsaasumik alloriarneruvoq. Folketingimulli ilaasortap erseqqissaatigaa arlaatigulluunniit suli qulakkeerinnittoqarsimanngitsoq.
Isumaqatigiissut Inatsisartuni Folketingimilu oqaluuserineqaqqaassaaq. Tamatumanilu pingaaruteqarpoq nunatta Danmarkimut tunngatillugu politikkikkut ajornartorsiutigilersinnaasaminik pisinnaatitaaffimminik annaasaqannginnissaa, Aaja Chemnitz Larsen oqarpoq.
- Nunatta ullumikkut suliassaqarfinni arlalinni namminersorluni oqartussaanerata attatiinnarneqarnissaa qulakkeertariaqarparput. Nunatta sapinngisamik pitsaanerpaanik atugassaqartinnissaa pitsaasunillu erniaqartinnissaa qulakkeerniarlugu Namminersorneq pillugu inatsisip nerriviup qaaniitittuarnissaa pingaaruteqarpoq.
AAMMA ATUARUK Danmarkip aningaasaliissuteqarneranut piumasaqaatit isumaqatigiinniutigileraat
Nunatta Danmarkillu suleqatigiillutik ineriartortitsinermut aningaasaateqarfiliornissaat Aaja Chemnitz Larsenip nammineerluni sulissutigisimavaa. Taamaakkaluartorli Nuummi Ilulissanilu mittarfiit Danmarkimit aningaasaaleeqataaffiginissaat pillugu isumaqatigiissutip Inatsisartunit sukumiilluinnartumik suliarineqarnissaa kaammattuutigaa. Taamatuttaaq isumaqatigiissummi piumasaqaatit Naalakkersuisut danskillu aningaasaqarnermut ministeriata akornanni isumaqatigiinniutigineqalerpata.
Kim Kielsenimmi tungaanit isumaqatigiissusiornissaq pillugu politikkikkut suliarineqartut maannamut pitsaasuusimanngillat, Aaja Chemnitz Larsen isumaqarpoq.
- Politikkikkut pitsaasumik naammassisaqassagaanni, pingaartumik Inatsisartut, Naalakkersuisullumi, suliaq pillugu ilisimatinnissaat soorunami pingaaruteqarpoq. Ingammik mittarfiliortiternissat pillugit apeqqummi taama pingaaruteqartigisumi, tamannami naalakkersuinikkut ukiorpassuarni oqaluuserisarparput. Isumaqarpungalu isornartorsiuineq (Kim Kielsenip isornartorsiorneqarnera, aaqq.) inissaminiittoq.
AAMMA ATUARUK Løkkemut isumaqatigiissut Erik Jensenip Naalakkersuisuni taperserumanngikkaa
Taamaakkaluartorli aningaasalersuinissaq pillugu Danmarkimut isumaqatigiissutip akuerineqarnissaata politikkikkut tapersersorneqarnissaa neriuutigaa.
- Mittarfiit maanna aallartisarnissaannut, inuussutissarsiornikkut ineriartortitsinissamut aningaasatigullu siuariartornissamut tapersersuisoqarnissaa neriuutigalugulu upperaara, pisoqanngippammi unittoortoqassammat.
Folketingimut ilaasortaq Aleqa Hammond (NQ) mittarfiliortiternissaq pillugu isumaqatigiissut pillugu KNR-imit oqaaseqartinniaraluarparput, KNR-illi saaffiginnissutaanut suli akissuteqanngilaq.
