Danmarkimit nunatsinnut angalaneq 2025-mi akitsussasoq
Danmarkimit nunatsinnut angalanissamut inniminniigaanni akiliummit 50 koruunimik saniatigut ilanngaatsittoqartalerataannaavoq.
Tamanna danskti naalakkersuisuisa SF Enhedslistenilu peqatigalugit silaannakkut mingutsitsinnginnerulernissamut politikikkut isumaqatigiissutaata nutaap inerneraa.
Isumaqatigiissut naapertorlugu Danmarkimit nunatsinnut 2025-mit avatangiisinut ilanngaammik 2025-mit 30 koruunimik 2030-llu tungaanut 50 koruuninngortussamik ilanngaanneqartalissapput.
Air Greenlandip ilaasunut akitsuut angalanissamut billettikkut toqqaannartumik ilanngaatigineqartalissanersoq ilisimanagu KNR-imut siusinnerusukkut oqaatiginikuuaa.
Ilaasunut akitsuummit aningaasat Danmarkimi silaannakkut angallannermi mingutsitsinnginnerulernermut ilaatigut aningaasaliutaassapput. Tamanna assersuutigalugu Danmarkimi nunap iluani silaannakkut angallannermut 2025-mi mingutsitsinnginnerulersitsinikkut Danmarkimilu silaannarmi angallannermut 2030-mi mingutsitsiunnaavinnikkut pissaaq.
- Timmisartukkut angallannermut akitsuut pisariaqartillugu ukiuni arlalinni oqaluuseraarput. Silaannakkut angallanneq akisunerulissaaq – muminganilli silaannarmi mingutsitsinnginnerulersitsisoqassalluni, danskit silap pissusianut, nukissiuutinut pilersuinermullu ministeriat, Lars Aagaard (Moderaterne) tusagassiuutinut nalunaarummi oqarpoq.
Ilaasunut akitsuut 50 koruuniusoq nunap iluani angallannermut Europamilu angallannermut atuutissaaq, akitsuullu 310 koruunimit 410 koruuniusoq 2030-mi akitsuut atuutilivippat akunnattumik isorartuumillu ungasissuseqartumut angalanermut atuutissalluni.
IA: Nunarput Danmarkimi utoqqaat pillugit akiliuteqassanngilaq
Akitsuutinit nutaanit aningaasat mingutsitsinnginnerulernissamut suliniutinut atorneqarlutillu Danmarkimi utoqqarnut aningaasassaaleqisunut akiliummut aamma atorneqassapput.
Utoqqarnut aningaasassaaleqisunut akiliut danskit soraarnerussutisiaqartut 300.000-it missaanniittut ukiumut ataasiartumik pisartagaat taamaalilluni 2025-mi januaarip allaqqaataani 4.800 koruunimut qaffanneqassaaq.
Kalaallilli innuttaasut danskinut soraarnerussutisiaqartunut akiliuteqartarnissaat naapertuilluarnerunngitsoq, folketigimut ilaasortaq IA-meersoq, Aaja Chemnitz isumaqarpoq.
- Angalanermut akisoreersumut akitsuutitigut qaffaaneruvoq. Nunatsinni nunarsaurmilu mingutsitsinnginnerulerniarneq tapersersussavarput. Kisianni kalaallit angalasut nunatsinnut angerlarniarlutik Danmarkimi soraarnerussutisiaqartunut ilassutitut tapimut akileeqataassanerat equngasortaqarpoq, taanna tusagassiuutinut nalunaarummi allappoq.
Taamaammat isumaqatigiissuteqartoqannginnerani nunarput minnerpaamik akitsuusiiffigineqarnissaa pillugu danskit akileraartarnermut ministeriat, Jeppe Bruus (S) saaffigaa.
