Air Greenland: Timmisartuussinermut akitsuut kalaallinut timmisartortunut akisunerulersitsissanersoq nalunartoq
Danskit naalakkersuisui timmisartuunneqarnissamut akisunerulersitsisumik siunnersuuteqaqqammerput.
Europap iluanit nunatsinnut timmisartornissap agguaqatigiissillugu 60 koruuninik akisunerulernissaa danskit naalakkersuisuisa ilaatigut siunniuppaat.
Siunnersuut akuersissutigineqassappat, atuisut nunatsinneersut Danmarkimit nunatsinnukarniarunik akiliinerusariaqartalersinnaassapput.
Air Greenlandimit oqarnerat naapertorlugu, timmisartuussinermut akitsuutaalersinnaasup bilitsinut akinut qanoq sunniuteqarnissaanut oqaaseqarnissaq siusippallaarpoq.
- Timmisartuussinermut akitsuutip qanoq aningaasartaqartiginissaanut paasissutissat tigussaasut akitsuutip Danmarkimit angalasartutsinnut qanoq sunniuteqarnissaanut oqaaseqannginnitsinni utaqqimaarpagut. Tamannami danskit naalakkersuisuisa siunnersuutaanni erseqqivinngilaq, Air Greenlandimi piujuartitsinermut attaveqaqatigiinnermullu pisortaq, Inga Dora G. Markussen, oqarpoq.
Akitsuutit siulliit bilitsit akiinut 2025-mi ilaatinneqalernissaat, akitsuutillu nalingata 2028-miit 2030-mut qaffakkiartornissaa pilersaarutaavoq.
Innuttaasut silap pissusaanik qajassuussillutik timmisartunnginnerunissaannut kajumilernissaat neriuutaavoq, naak ungasinnerusunut timmisartuussinerit CO2-millu aniatitsiffiunerusut silap pissusaanut sunniutissaat nalullugu danskit naalakkersuisuisa nassuerutigigaluaraat.
- Nalileruminaammat, eqqorluartunik kisitsisaataateqanngilagut. Ungasissunulli timmisartunnginnissamut kajumilersitsivugut, silap pissusaanut ministeri, Moderaternemeersoq, Lars Aagard, oqarpoq.
Danskit naalakkersuisuisa oqarnerat naapertorlugu, Danmarkip iluani timmisartuussinerit tamarmik ikummatissanik minguitsunik timmisartuussinermut akitsuummit isertitanit qulakkeerneqartunik atuillutik kingusinnerpaamik 2030-mi angalasarnissaat pilersaarutaavoq.
