Løkkep amerikamiut aallartitaat Kalaallit Nunaanni kilitsissiatut suliaqartoqarsinnaanera pillugu oqaloqatiginiaraa

Danskit nunanut allanut ministeriata, Lars Løkke Rasmussenip (M) Kalaallit Nunaannut kilitsissiatut suliaqartoqarsinnaanera pillugu amerikamiut aallartitarigallagaat Nunanut allanut ministereqarfimmi oqaloqatiginiarlugu aggersarniarpaa.

Løkke nunanut allanut ministereqarfiup Warszawami pingasunngornermi ataatsimiinnissaanut ingerlaarnermi oqarpoq.

USA-p Kalaallit Nunaannut kilitsissiatut suliaqarnini annertusarniaraa, amerikamiut aviisiata, Wall Street Journalip pingasunngornermi allaaserisaqarnerata kingorna taanna taama nalunaaruteqarpoq.

Wall Street Journalip allaaserisaa naapertorlugu paasissutissat tusarfinnit marlunnit suliamik ilisimannittumeersuupput.

- Ikinngutigiit akornanni kilitsissiatut suliaqartoqarneq ajormat tamanna ernumassutigingaatsiarpara.

- Tamanna eqqortuunersoq naluarput, tamannami aviisini allassimasuummat. Tamannali oqaaseqartunit eqqunngitsuunerarneqarpasinngilaq. Tamanna ernumassutigaara, Lars Løkke Rasmussen oqarpoq.

Aarlerinartoq

Taamaammat suliaq maanna diplomatiskimik suliaqarfiulerpoq. Tassa Danmarkip amerikamiut aallartitaannut paasissutissat eqqortuunersut paasinarsisinniarsariniarpai aamma amerikamiunut nunaminit qanimut iligisarisamit kilitsissiatut suliaqartoqarsinnaanera Danmarkimit annikitsuinnartut isigineqanngitsoq erseqqissaatiginiarlugu.

- Amerikamiut aallartitarigallagaat paasissutissat uku aarlerinarluinnartut eqqortuunersut uppernarsartinniarsariniarpagut. Isummatsinnillu takutitsinissamut periarfissaqassalluta.

- Danmarkimi Kalaallit Nunaannilu paasissutissanik pissarsinissamik siunertaqartoqarluni taama periuuseqartoqassappat ernumanarluinnarpoq.

- Taama suleqatigiittoqassanngilaq, taamaammat tamanna ilungersunarluinnartutut isigaara, Lars Løkke Rasmussen oqarpoq.

USA-p præsidentiata, Donald Trumpip Kalaallit Nunaannik tigusinissamik kissaateqarnerminik arlaleriarluni oqariartuuteqarnikuunera eqqarsaatigalugu amerikamiut aviisianni taama paasissutissaqarnera pingaartumik ernumanartuuvoq.

/ritzau/