Danmarkimi naalakkersuisut: Nunanut allanut timmisartorluni angalaneq akisunerulissaaq

Danmarkimiit timmisartorluni nunanut allanut angalaniaraanni akisunerulaalissaaq.

Timmisartuussinermi akitsuutit atuutilersinneqarnissaat, Danmarkimi naalakkersuisut sisamanngornermi nalunaarutigaat.

Nukissiuutinik ataavartunik siunissami atuinerulernissamut aningaasaliinissaq pillugu akitsuutinik eqqussisoqarnialersoq, Danmarkimi naalakkersuisut nalunaarutigaat.

Timmisartorneq isorartuneruleriartorpat akitsuutit qaffakkiartussapput.

Europap iluani angalaniaruit billetsit agguaqatigiissillugu 60 koruuninik akitsussapput.

Danmarkimiit isorartukannersumik angalaniaruit, assersuutigalugu New Yorkimut angalanermi billetsit 240 koruuninik akitsussapput, Asiamilu Bangkokimut angalanermi billetsit ullumimut naleqqiullugu 390 koruuninik akitsussallutik.

Timmisartuussinermi akitsuutit siulliit 2025-mi atuutilersinneqassapput, 2028-miillu 2030-p tungaanut akitsoriartuaassallutik.

Danmarkip iluani timmisartuussinerit tamaasa orsussamik nukissiuutinit ataavartumit kingusinnerpaamik 2030-mi piunissaat, Danmarkimi naalakkersuisut pilersaarutigaat.

Timmisartorluni angalasoqarpiarunnaarnissaa anguniagarinngikkitsik, Danmarkip akileraartarnermut ministerip Jeppe Bruusip oqaatigaa.

- Timmisartut orsussamik mingutsitsinnginerusumik atuinerulernissaat anguniagaavoq, taanna oqarpoq.

- Timmisartorluni angalosoqarpiarunnaaqqusinata timmisartuussinernili orsussamik mingutsitsinnginerusumik atuinerulernissaq anguniagaraarput.