Aaja: Danmarkimik niueqateqarnissarput ammaffigissavarput

- Inuussutissarsiornikkut Danmarkimik suleqateqarnitsinnut akerliuneq qimattariaqarparput, folketingimut ilaasortaq Aaja Chemnitz Larsen, Inuit Ataqatigiinneersoq, taama oqarpoq. Folketingimut qinigassanngortittup Kuno Fenckerip, Partii Naleqqameersup, Danmarkimik niueqatigiinnerup suli annertunerusumik pituussaarfiginissaanik anguniagaa isornartorsiorpaa.
marsip 25-at 2019 14:49
Nutserisoq Per Rosing

- Aningaasat nunatsinniit anianerujussuannik Danmarkillu sinneqartoorutinik tamanik pisarneranik isumallit isumaqitiginngilluaasarpakka, Aaja Chemnitz Larsen Inuit Ataqatigiinneersoq oqarpoq. 

Inuussutissarsiornermik suliaqartup Kuno Fenckerip Partii Naleraq sinnerlugu Folketingimut qinigassanngortinnini sapaatip akunnera kingulleq nalunaarutigereeraalu oqaaseqaat taanna takkuppoq. 

AAMMA ATUARUK RAL-ip siulittaasorisimasaa Folketingimut qinigassanngortittoq

Nunatta killiligaannginnerusumik niueqateqarsinnaanissaa niuernikkullu Danmarkimit pituussaarnerunissaa anguniagaraa. 

Niuernikkut siornatigut kisermaassisuusoq, Kongelige Grønlandske Handel (KGH), nunatta nunanik allanik niueqateqarsinnaaneranik ulloq manna tikillugu killilersuisuusoq Kuno Fencker Sermitsiaq.AG -mut oqarpoq.

Nunanik allanik amerlanerusunik killiligaanngitsumik niueqarteqarsinnaanermik kissaateqarneq Aaja Chemnitz Larsenip isumaqatigaa, kisianni nunatta killiligaanngitsumik niueqateqarsinnaannginnera pillugu Danmarkimik pisuutitsineq "eqqunngitsumik pineqarsimanermik eqqarsartaasiusoq" isumaqarluni.

- Taamatut eqqarsartarneq qimattariaqarparput akerlianilli nunatsinni aningaasaqarnikkut suliffissaqarnikkullu annertusaaneq pilersinniarlugu nunat allat, tassa Danmarkip nunallu niuerfigineqarsinnaasut soqutiginartut allat, suleqatiginerisigut unammilleqatigiinneq iserfigisariaqarparput, Aaja Chemnitz Larsen oqarpoq. 

AAMMA ATUARUK Folketingimut Naleqqamiit qinigassanngortittoq siulleq piareerpoq