Dana ilaquttanilu siullersaallutik piterarnerani qimagussunneqarput
Qinoqatigiinneq, qianeq annakkuummerneq.
Tassa Tasiilami sapaatit akunnerata siuliata naanerani sekuntimut 53 miiterisut sakkortutigisoq angusarlugu piterarmat, naalungiarsuutillip Dana M. Poulsenip aqqusaagaasa ilaat.
- Annilaanganartorujussuuvoq, qulaanilu tusaavara soorlu kaanngarpaluttoqalersoq illup qaavani. Naalarninartorujussuuvoq.
- Naalungiarsut pingasut, meeqqat pingasut inersimasullu pingasuuvugut, Dana M. Poulsen oqarpoq.
Taassuma anaanami najugaqarfiani anaanami meerarsiai namminerlu meeqqani, ernuttanilu ilagalugit unnuk sivisunaarpaat.
AAMMA ATUARUK Piterarnerata kingorna igalaat iluarsartugassat 130-t tikillugit amerlassuseqartut
- Meeqqat ilagigakkit nukittuniarsarinaqaaq. Atisalersoreerluta sillimavugut, meeqqat atisalersoqqallutik sinilerput.
Ilaqutariit sinittarfiup aappaanut innakaaqqaaraluarput, ujaraaqqalli teqqaasut igalaamut torarneri sakkortummata taakku sininnaveerput.
- Ujaraaqqat tikiuttarnerani allaanngilaq milloortoqarpaluttoq. Taava nipituallaaqimmat sinittarfiup aappaanut nuuppugut.
Igalaat piterarnerani aseruatiternikut.
- Qimaapallappugut taqqamunga sinittarfimmut. Sinittarfiup aappaa nipikinneruvoq, kisianni anorili tusaavarput, Dana M. Poulsen oqarpoq.
Piteraq ima sakkortutigaaq umiatsiat, biilit, snescooterit oqigisaallutik teqqarput.
Dana M. Poulsenip anaanaa Anitse Ignatiussen pisup nalaani Nuummiikkaluarluni aamma ungasianiit isumaalunneq imaannaasimanngeqaaq.
AAMMA ATUARUK Tasiilami piterarmat illut ilaat innarlerneqangaatsiarpoq
Anitse Ignatiussenimmi panini Dana M. Poulsen piteqqap pileruttornerani Nuummiit oqarasuaatikkut attavigeqattaarpaa.
- Assut isumaalullunga malinnaagama oqaluutereeraangakkit mobiili iligangakku qullilisarlunga isumaalunnerup piarnik.
- Taannaqami sianeqqippoq igalaat ilai aserortiterlutik aallartissimasut qatserisartullu igalaanik matooriartorlutik iserserimasut.
Anitse Ignatiussenip angerlarsimaffiani igalaat amerlanerit seqummakuummata qisunnillu assiaquteqarmata inip ilua ulluugaluaraanga taarpoq, tamannalu aamma najugalimmut akisussaqisoq, inuttaa oqarpoq.
- Qulliit ullaarnganiit ikumatittariaqartarpagut, taangaarmat. Taamaammat aamma innaallagiamut akiligassaq akisussaqaaq, Anitse Ignatiussen oqarpoq.
Annakkuummernerup pianik qianeq
Dana M. Poulsenip meeqqat arfinillit inersimasullu marluk ilagalugit katersortarfimmut qatserisartunit qimarngunneqarput. Taakku Tasiilamiittuni siullersaallutik qimagutiterneqarput.
- Qiasunngungaarama nipera sajuttuinnaavoq eqqissinerup pianik, qatserisartullu assut qujaffigalugit.
Unnulli ingerlanerani meeqqat nukarliit sinngutilermata misigissutsit qaffakaapput.
- Aatsaat ernera sinilermat qinullunga qialerpunga.
- Angerlarsimalluta suli sinittarfimmiikkatta annilaangangaaratta tamatta assatsigut tigulluta qinoqatigiippugut.
Kalaallit Nunaanni politiit pigaartuisa ittuat Jørgen Madsen naapertorlugu unnuap ingerlanerani inuit 47-t angerlarsimaffiiniit qimagussorneqarsimapput, taakkunannga 30-t katersortarfimmut, 13-t ilaquttaminnut sisamallu napparsimavimmiillutik. Napparsimavimmiittut piteqqap piliaanik napparsimavimmut unissimanngitsut ilisimatitsissutigineqarpoq.
Piterarnerani inunnik ajoqusertoqanngilaq.
