Tasiilami piterarmat illut ilaat innarlerneqangaatsiarpoq
Illumik piginnittup Gundine Magnussenip illumi iluarsartuunneqarnissaanut akissaqarnissani qularaa. Gundinep ernini ukuanilu Ulrikke Ertaq ernuttani ernutaqqiutinilu illoqatigai. Ulrikke Ertaallu piteqqap eqquinera ima oqaluttuaraa.
- Una sinittarfik qaninneq silammut ammarpoq, illup eqqaanut nakkarpoq. Ammaneqarami qilaami, taava taanna aqinnerpaartaa anorersuup ammut naqillugu nakkartippaa, qulaata tungaaniittut teqqarlutik, iluatalu tungaanut ammut nakkartippaa, silaannarmut ammalerluta.
Ulrikke Ertaarlu nangippoq:
- Taava marloqeqqalersoq, naalungiarsuttaqarpugut qiteqquteqqammarsoq taava aamma marlunnik ukiulik. Unnuami marloqeqqalersoq qatserisartut qimarnguppaatigut, Ulrikke Ertaq oqarpoq.
Tasiilami piterarmat illup innarlerneqangaatsiarnera takuneqarsinnaavoq.
Asseq: Else Olsvig.
Illu ukiorpat najugaqarfigineqarsinnaanngilaq
Piteraq qattormat ilaqutariit illuminnut uteramik takusaat tujorminarsimaqaaq, illup qaliata ilarujussua putorujussuaqalersimammat. Illup qaliani putoq suli suliarineqarsinnaanngikkallarmat illunik eqqugaasunik iluarsaassigasuartut ilaqutariit Magnussenikkut illuata qalia plastikkimik matugallaannarpaat.
- Qujanartumik illup qalia qalissiarsuarmik qallersimavaat qisuatsianillu aalajangiusersorlugu, taava toqqissimanarnerulerpoq masakkunnaarmat.
Ilaqutaarit Magnussenikkut illuat Tasiilami illut pisoqaanerit ilagaat, ukiullu ingerlaneranni aserfallakkiartorsimalluni ussiitsunngorsimaqalunilu. Ulrikke Ertaarlu nangippoq:
- Ukiukkut sialussualeraangat masattaqaaq, qorlulertarami.
Taamaammat ilaqutariit illu najuinnassagunikku iluarsaanneqanngippallu ukiornissaa assut ernumagaat.
- Taamaammat aaqqissuunneqarnissaa kissaatiginaqaaq. Taamannak ukiiffugissagutsigu atorsinnaanngilaq. Ukiukkummi piterakkajuttaqaaq, piteqqippammi nalunngilara arlaatigut ammaqqissasoq putoqqissasorlu. Taanna ilungersunaqaaq. Gundina kommunimut saaffiginnimmat qujanartumik oqaloqatigineqartussatut nalilerpaat.
Tasiilami piterarneranit eqqugaasut ilaat Ulrikke Ertaq taama oqaluttuarpoq.