Piterarnerata kingorna igalaat iluarsartugassat 130-t tikillugit amerlassuseqartut
Tasiilami sapaatip akunnerata siuliani piterangaatsiarpoq. Tamatumalu kingunerisaanik igalaarpassuit illoqarfimmilu illut qalii aserorterput.
Tasiilami piteraq Iserit A/S-ip inissiaataanik BSU-lu (boligstøtte hus aaqq.) aqqutigalugu illuutinik arlalissuarnik eqquivoq.
Kommunip inissiaatileqatigiifia Iserit A/S igalaanik aseruasimasunik 70-init amerlanerusunik sapaatip akunnerata matumaniik iluarsartuussilluni aallartissaaq.
BSU aqqutigalugu illuutit aamma annertuumik iluarsartuunneqartariaqartut, Iserit A/S-mit teknikkeqarnermut pisortaq naliliivoq.
Tasiilami sapaatip akunnerani kingullermi innuttaasut arlalissuit qatserisartunut ikioqqullutik siarngupput.
Piteqqamit igalaajartitertorpassuit ilaat katersortarfimmut qimarngunneqarput.
Iserit A/S-ip inissiaataanik ajoqusertunik iluarsaassisoqassaaq.
AAMMA ATUARUK Tasiilami piterarmat illut ilaat innarlerneqangaatsiarpoq
Taakkua saniatigut BSU aqqutigalugu illuutit 1950-60-ikkornisaasut piteqqamit aamma eqqugaapput.
Illut ilarpassui aserfallassimareeqimmata taakkuninnga iluarsartuussinissaq annertussasoq, Tasiilami Iserit A/S-ip teknikkeqarfiani pisortaq Michael Waainstz naliliivoq.
- Iserit A/S-ip illuutai pisariaqartitsinerpaat siulliuppagut, illullu sinnerinik iluarsaassinerit sapaatip akunnerata tulliani aallartissapput, Michael Waainstz oqarpoq.
Igalaat nutaat anorimut ujaqqanullu illersorsinnaassasut
Igalaat 120-nit 130-nut amerlatigisut ukiortinnagu taarserneqassapput. Illuni igalaat nutaat mattunerullutik anorersuarnerani ujaqqanit allanillu eqqorneqarsinnaasariaqarput.
Piterarnerani illut igalaavi illullu qalii aserorterneqarput. Assi: Else Olsvig
Igalaallu taartissaasa umiarsuarmut kingullermut novembarip tallimaanni ilaallutik tikinnissaat neriuutigineqarpoq. Igalaassat tikissinnaanngippata ukioq Tasiilarmiorpassuarnut taarnerusutut misinnartussaassammat.
- Umiarsuarmut kingullermut angumersissanngippata ukiorulu piteraqqinngitsoornavianngimmat qanoq pisoqarsinnaanera nalunarluinnarpoq, inissiaatittami ilaat 30-t 40-llu akornanniittut igalaajaqqammata.
Illut BSU aqqutigalugu Taasilarmiunit pigineqartut iigaat, qaliaat igalaavilu piteqqamit eqqugaasut iluarsartuunneqarnissaat piginnittut namminneq akiligassarigaat, Iserit A/S-imili teknikkeqarfimmi pisortaq Michael Waainstz oqarpoq.
Namminneq illuutillit namminneq iluarsartuussinissaq isumagissagaat
- BSU aqqutigalugu illuutit ilarpassui ukiorpassuarni iluarsartuunneqarnikuunngillat imaluunniit annikitsuinnarmik iluarsaanneqarsimallutik. Aserfallalluinnaqqagamik anorersuarmit eqqugaanerpaapput. Taamaakkaluartorlu inuttaasa najuinnartariaqarpaat, taanna oqarpoq.
BSU aqqutigalugu illuutillit Tasiilami nunaqarfittaanilu amerlapput.
- Nunarfinni illut tamangajammik BSU aqqutigalugu illuutigineqarput. Illorpassuillu aserfallalluinnarput piginnittut amerlasuut iluarsaassinissamut akissaqanngimmata. Aserfallakkaluttuinnarput, ilaallu ima aserfallatsigaat allaat ilaasa qaliaat piteqqamit tigitaallutik, Michael Waainstz oqarpoq.
AAMMA ATUARUK Isertoq Tiilerilaarlu nunarsuarmut suli attaveqanngitsut
Kommuneqarfik Sermersuup Iserit A/S-illu Tasiilami immikkoortortaasa illunik iluarsaassinissaannut atortussat Islandimi Norgermilu pilersuisunit umiarsuakkut kingullikkut nassiunneqarnissaat suli qulakkeerneqanngilaq.
