Coronavirusip ajornartorsiortitsinera: KNR-ip nipilersukkat kalaallisoortut kisiisa appittassavai
Nipilersortartut aningaasarsiutigalugu coronavirusertoqarnerani tusarnaartitsisinnaanngikkallarput.
Taamaattumik:
- Radiokkut nipilersukkat tamaasa kalaallisuunngortikkallarpagut uani nualluusuup ingerlanerata nalaani, KNR-ip pisortaa Karl-Henrik Simonsen oqarpoq.
- Nipilersortartut aammalu isiginnaartitsisartut eqqumiitsuliortut periarfissaat aningaasarsiornissaminnik killilerujussuanngornikuuvoq. Taamaalillugulu aamma uagut inuiaqatigiinni taamatut ajornartorsiulissagaluarpata qanoq oqassunga pakkersimaarniarlugit tapersersorniarlugit.
Toqqorsivimmeersut aallakaateqqitat eqqaassanngikkaanni
KNR-radiomi ullormut nipilersukkat atorneqartut nalinginnaasumik 50 procentii kalaallisuujusarput, massakkulli nipilersukkat tamaasa kalaallisuunngussapput.
Toqqorsivimmeersut aallakaatinneqartussat nipilersugartaat allamiunit atorneqartut eqqaassanngikkaani.
- Naatsorsuutigaarput immaqa telefonit imaluunniit aallakaatitsissutit allat atorlugit toqqaannartumik immiussisinnaasut, Karl-Henrik Simonsen oqarpoq.
Aaqqiissutaagallartoq radiokkut kisiat atuutissanngilaq:
- Nipilersortartut ataasiakkaat imaluunniit nipilersoqatigiit, soorunami aamma inuttassaat aningaasartassaallu killeqarmata, inuit ataasiakkaat imaluunniit arlaliugunik immiussisinnaapput imaluunniit toqqaannartumik aallakaatitsillutik taava uagut TV-kkut aallakaatissinnaallutigit, Karl-Henrik Simonsen oqarpoq.
KNR-imit piffissami matumani kalaallisuinnaq nipilersortoqarnissaanik aalajangiisoqarnera Nunatsinni Nipilersortartunit nuannaarutigineqarpoq.
- Kalaallit nipilersortartarut isaatitaarunneranni massakkut annaasaqarujussuarnerannilu aningaasaqarnerat KODA-minngaanniit aamma iluaquserneqassasut.
Inunnguaq Petrussen, Nunatsinni Nipilersortart Kattuffianni siulittaasoq oqarpoq.
Nipilersukkat raatiukkut atorneqaraangata nipilersortartut KODA aqqutigalugu aningaasarsisarput.
Aningaasat KODA aqqutigalugu KNR-imit nipilersortartunut agguaanneqartartut ukiumut 2 mio. koruunit missaaniipput.
