Assammik arsarnermi inuusuttuaqqat GM-qarnissaat ukiamut kinguartinneqarpoq. Inersimasut unamminissaat ullulerneqanngitsumik kinguartinneqarpoq

Corona-viruseqarmat GM-it kinguartippaat

Timersornermi kattuffiit arlallit porskikkunni pissartanngorniutsitsisussaagaluarput. Arlallit ukiamut kinguartitsipput ilaasa pissutsit utaqqimaarallaraat

Ukiuni qulikkaani arlalinni porskikkunni nuannattoqarluniu pissangasoqartarpoq timersuutini assigiinngitsuni porskip nalaani pissartanngorniuttoqartarmat.

Porskilli nalaa ukiormanna nipaannerussaq pissartanngorniunnissat tamarmik kinguartinneqarmata. Timersuutit pineqartut tassaapput sisoraaserluni oqilaniunneq, sulorarneq, nerrivimmi arsaararneq, volleyball, sangusaarnerit kiisalu snowboard.

AAMMA ATUARUK Innuttaasut angerlarsimalersut nunani allamiittut allattorsimaffianniikkunnaarnissartik eqqaamassavaat

Kalaallit arsaattartut kattuffiat KAK nalunaarpoq futsalimi angutit inersimasut, arnat angutillu inuusuttuaqqat unammersuarnissaat ukiamut kinguartinneqartut. Aaqqissuisuusussat allanngortinneqanngillat.

Angutit inersimasut futsalimi GM-qarnissaat oktoberip 19-niit 25-at ilanngullugu Sisimiuni pissaaq arnat futsalimi unammersuarnerat oktoberip tallimaaniit aqqarnata tungaanut pisussanngortoq. Angutit U-18 Ilulissani septemberip 28-niit oktoberip tallimaata tungaanut unammersuassapput.

Pingasoriaammik eqqugaasut

Futsal GM:

Angutit inersimasut: 19. - 25. oktober Sisimiut 
Arnat inersimasut: 5. - 11. oktober Nuuk
Angutit U-18: 28. september - 5. oktober Ilulissat

Nerrivimmi arsaararneq:

Ukiaanerani atuanngiffik (illoqarfik suli inissinngilaq)
Assammik arsarnermi GM:

Inuusuttunut GM Sisimiut (ilimanarpoq ukiaaneran atuanngiffimmi)
Inuusuttuaqqanut GM Nuuk (ilimanarpoq ukiaaneran atuanngiffimmi)
Inersimasunut GM Ilulissani kinguartippoq - ullulernagu
Volleyball GM:

Ullulernagu kinguartippoq
Sisorarnermi GM:

2020-mi tamarmik taamaatipput

Sisorariaatsini arlalinni pissartanngorniunnissaagaluit assut eqqugaapput. Timersuutini allanisut piffissamut allamut nuussiinnarsinnaanngillat aput pinngitsoorsinnaannginnamikku.

- Taamaattumik aalajangerpugut sisorariaatsini arlariinni GM taamaatiinnarniarlugu. Aamma ilimageersinnaavarput angalaqqusiunnaarneq atorunnaarpat angalaniuttorpassuaqassasoq, aamma imaassinnaavoq coronap ajornartorsiortitsinera qaangiuppat aput atugassaajunnaareersimasoq, Kalaallit Nunaanni sisorartartut kattuffianni siulitaasoq Timooq Mølgaard KNR-mut oqarpoq.

Kalaallit sisorartartut taamaasillutik arlaleriarlutik coronamit akornuserneqarput. Sisorartartut arlallit Arctic Winter Gamesimut aamma Danmarkimi pissartanngorniunnerni peqataasussaagaluarput. Unamminissalli taakku marluk tamarmik unitsinneqarput.

Porskikkunni GM-rtoqartarput ullunik suliffiusussanik annaasaqarnissat pinngitsoorniarlugu. Taamaattumik assammik arsartartut aamma nerrivimmi arsaarartartut oktoberip ukiaanerani atuanngiffeqartoqarnissaa GM-rfissatut aalajangiuppat. Tassa assammik arsarnermi inuusuttuaqqat ukiaanerani atuanngiffeqarnermi Ilulissani unammersuassapput. Inersimasut aamma llulissani unammersuartussaagaluartut ullulerneqanngitsumik kinguartinneqarput taakkulu Ilulissani unammisussaagaluarput.

Sulorartartut aamma volleyballertartut porskimi aamma GM-rtussaagaluarput.Timersuutini taakkunani siulersuisut aalajangerput kinguartitsiniarlutik unamminissalli nutaamik ullulinngikkallarlugit.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 10353
  Tunillanneqarsimasut
17
  Peqqisseqqittutut nalunaarutigineqartut 16
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  oktobarip 23-at 2020 nal. 10:45