Corona pillugu killilersuutit inuit qanoq isumaqarfigineraat isumasiuinermi misissorneqarpoq
Corona pillugu Nunatsinni killilersuutit qanoq isumaqarfigineqarnerat pillugu Aperaa.gl-ip isumasiuinerani kalaallit 360-it apersorneqarput.
Akissutini malunnarpoq, apersorneqartut killilersuutit maannakkutut itsillugit iluarigaat imaluunniit suli amerlanerusutigut killilersuisoqartariaqarsorigaat.
Isumasiuineq pillugu paasissutissat
Aperaa.gl-ip isumasiuinerani peqataasut 360-it ilaatigut aperineqartarput, Namminersorlutik Oqartussat corona pillugu killilersuutaat qanoq isumaqarfigineraat.
42,2 procentit akipput killilersuutit naleqquttut
35,3 procentit akipput, killilersuutit sakkortunerusariaqartut
13,6 procentit akipput, killilersuutit sakkukinnerusariaqartut
Isumasiuinerup inernerisa naatsorsueqqissaarinikkut nalorninassusaat 5 procentit missaanniippoq.
Najoqqutaq: Aperaa.gl
Isumasiuinermi killilersuutit 40 procentit naleqqussoraat 35 procentillu isumaqarlutik suli sakkortunerusariaqaraluartut. 13,6 procentit isumaqarput sakkukinnerusariaqartut.
- Coronamut atatillugu annertuumik sunnerneqartuugaluit killilersuutit qasukkaanissaq kissaatiginngilaat.
- Akerlianilli amerlasuut kissaatigaat amerlaqisut decembarip 23-anni isumasiuineq najoqqutaralugu isumaqarput, amerlanerusutigut killilersuisoqartariaqaraluartoq, Aperaa.gl-imi siunnersorti Allan Dalsgard oqarpoq.
Coronapas aamma qanimut assiaqutit
Nunatsinni coronap atuunnerani killilersuutit amerlisarlutillu ikilisarput.
Immaqa eqqaamassavat inuit amerlanerpaamik 20-t katersuuteqqusaanerat imaluunniit 2020-mi upernaakkut timmisartumik angalasoqaqqusaajunnaarnera. Ukiup ataatsip matuma siorna ukiortaaliivissoq aamma Kalaallit Nunaannukartoqaqqusaajunnaaqqippoq, taamanilu sapaatip akunnerini pingasungajanni tamanna atuulluni.
Maanna ukiortaaliivinnerani assersuutigalugu Nunatsinni tamani caféliarniaraanni imaluunniit sutorniartarfiliarniaraanni coronapassimik takutitsisinnaasariaqarpoq.
Tamatuma saniatigut martsip arferngata tungaanut Nuummi, Upernavimmi Qasigiannguanilu pisiniarfinni bussinilu qanimut assiaquteqartussaalluni.
Savalimmiuni allaffeqarfik isumasiuisuuvoq
Savalimmiuni Spyr.fo Aperaa.gl-imik ingerlatsisuuvoq. 2015-imili Spyr.fo Savalimmiuni isumasiunernik, niuerfiit misissornerannik kiisalu qinersisartut pillugit misissuinernik suliaqartarnikuuvoq.
Spyr.fo qinersiartut pillugit misissuigaangat nalinginnaasumik inuit 500-t apersorneqartarput, kalaallilli isumasiorneranni taamaallaat inuit 360-it peqataapput. Taakkua Nunatsinni tamaneersuullutillu tamarmik 18-it sinnerlugit ukioqarlutik.
Allan Dalsgard-ip oqarnera naapertorlugu inuit apersorneqartut 360-it amerlavallaanngillat, kisiannili erseqqissarpaa, peqataasut sungiaassusaat (arnat angutillu), ukiui kiisalu suminngaanneerneri apeqqutaatinneqarnikuusut. Kisiannili apersorneqartut qanoq ilinniagaqarneri qanorlu isertitaqarneri apeqqutaatinneqanngillat. Ilinniakkat isertitallu tassaapput isumasiuinerni inuiaqatigiinni assigiinngitsumik inissisimasut sinniisoqartinnerannut qulakkiissutaasartut.
