CO2-mut akitsuut Air Greenlandip isoraa
Kinami naalakkersuisut, nunat tamalaat akornanni timmisartuussinissamut maleruagassanik unioqqutitsisisoqarnerarpaat.
Aamma Air Greenlandimi akitsuut nuannaarutigineqanngilaq, kisianni inatsisaammat eqqunneqarpoq.
Taamaalilluni nunanut allanut, soorlu USA-mut, India-mut, Ruslandimut, Europamiut CO2-mut akitsuusersueriaasiannut akerliusunut, Kinamiut ilanngupput. Akitsuut CO2-mik aniatitsinermik millisaanissamik siunertaqaraluarpoq.
Air Greenlandimi aningaasarsiornermut pisortaq, Christian Keldsen, oqarpoq timmisartuusseqatigiiffiit amerlanersaasa nunanit EU-mi ilaasortaanngitsuneersut, EU-mulli timmisartuussisartut akitsuut akerliuffigigaat.
- EU-mut timmisartuussigaagatta malittarisassat taakkua malittussaavagut. Aammali Nunatsinni aamma akitsuuteqaleraluarpat, taava uaugut marloriaammik akiliisalissaagut. Tassalu equngasumik unammisoqalissaaq, piginneqatigiiffiit ilaat allanut naleqqiullutik aningaasartuuteqarnerulissammata. Tamaammat aaqqisuussineq una naapertuuttuungilaq, EU-miit EU-mullu timmisartuussinermi unammilleqatigiinnermut iluaqutaanngitsoq, Christian Keldsen oqarpoq.
Air Greenlandimi EU-p CO2-mut akitsuutaa nuannaarutigineqanngilaq, tuniniaanermut pisortap oqarneratut suliniut suliareqqissaagaanngimmat akisummallu.
- Suliniut taanna peqqutigalugu ukiuni arfineq-pingasuni tulliuttuni 15 millioner koruuninik amigartooruteqalissaagut. Taakkulu arlaatigut pissarsiariniartariaqarpagut, CO2-mik aniatsitsinissamut akuersissutinik, tsassa kvote-nik, amingaateqarnerput peqqutigalugu, Christian Keldsen oqarpoq.
Christian Keldsenip naatsorsinnaanngilaa billetsit qanoq akitsortigissanersut.
- Timmisartuusseqatigiiffiit tamakkerluta akitsuut nuannaarutiginngilarput, inatsisaagamili eqqunneqarpoq uatsinnilu aamma atuutilerpoq, Christian Keldsen taama oqarpoq.
Silap pissusaanut EU-mi kommissærip Connie Hedegaardip oqaaseqartartua Kinamiut pinngitsooratik akiliisassasut oqarpoq. Taamaaliortoqanngippanngooq akiliisitsinermik kinguneqassaaq, Europamilu timmisartoqarfinnut Kinamiut timmisartui allaat meqqusaajunnaariaannaallutik.
Taassumali Kinamiut allakkatigut suli akissuteqarsimannginnerarpai, nunanullu CO2-mik aniatitsitsinikinnerulerniarsarisunut piumasaqaatinik qasukkaasoqarsinnaanera periarfissaanerarlugu.