Assi: Joseph Morris/Corporate Video Production Toronto/Flickr

Canadami ministeriunerup naggueqatigiit Inuit naapeqatigai

Canadami ministeriunertaap Justin Trudeaup Canadami nunap inoqqaavinik pingaartitsilluni suliniuteqarniarnini qineqqusaarutigaa, qineqqusaarutinilu maanna piviusunngortinnialersimallugit. Naggueqatigiit Inuit marlunngormat naapippai.

Justin Trudeau marlunngormat tupaallatsitsivoq, ministerimmi arlallit peqatigalugit Canadami naggueqatigiit Inuit suliniaqatigiiffiata Inuit Tapiriit Kanatamip Ottawami allattoqarfianut siumut nalunaarutigineqarsimanngitsumik pulaarami. Canadami ministeriuneq Inuit Tapiriit Kanatamut siullerpaamik pulaarpoq.

Aamma atuaruk Canadap naalakkersuisui nunap inoqqaavinut pitsaanerusumik attaveqalerusuttut

ITK-p præsidentia Natan Obed oqarpoq Trudeau ITK-mut pulaarsimasoq, naggueqatigiit Inuit siuttui oqaloqatiginiarlugit, naggueqatigiit Inuit illoqarfinni nunaqarfinnillu assigiinngitsuni unammiligassaat suunersut paasisassarsiorfiginiarlugit, soorlu aamma Issittumi inuussutissarsiutitigut ineriartortitsisoqarnissaanut periarfissat eqqartorusussimagai.

- Canadami naggueqatigiit Inuit Canadallu sinneranut pissutsit nutarterlugillu pitsanngorsarneqarnissaat eqqartorpavut. Pissutsit soorlu ataqqinnineq, pisinnaatitaaffiit, suleqatigiinnerit inooqatigiinnerillu eqqartorneqarput, Justin Trudeau oqarpoq, nangillunilu:

- Inunnik isumaginninnikkut aningaasarsiornikkullu ajornartorsiutit aaqqiivigineqarnissaat suleqatigiissutigissavagut, naggueqatigiit Inuit inuunerat pitsanngorsarneqarsinnaaniassammat, Trudeau oqarpoq.

Inuit Tapiriit Kanatamip ministeriuneq ataatsimeeqatigiumammagu Trudeaup qujamasuutigaa:

- Naggueqatigiit Inuit atugaasa pitsanngorsaavigineqarnissaat kissaatigaara, Issittullu piorsaavigineqarlunilu ineriartortitsiviunissaa aamma sulissutiginiarlugu, Canadap ministeriunerunera Justin Trudeau oqarpoq.

Aamma atuaruk Canadami general-guvernøri pissutsinik iluarsiinissamik neriorsuuteqartoq

Jobie Tukkiapik, Makivik Corporationimeersoq, oqaluttuarisaanermi pingaarutilittut taaneqartumi ataatsimiinnermi peqataavoq, soorlu aamma Nunatsiavummi præsidenti Sarah Leo, Nunavut Tunngaviup præsidentia Cathy Towtongie, Inuvialuit Corporationimilu siulittaasunngorlaaq Duane Smith aamma peqataasut.

Ministeriuneq Justin Trudeau, ministeriisalu, Inuit Nunangatimut Canadami naggueqatigiit Inuit siuttuinit aamma qaaqquneqarpoq. Pissutsit nutaat Canadami atuutilersimapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat