Canadap naalakkersuisui nunap inoqqaavinut pitsaanerusumik attaveqalerusuttut
Canadap premierministerertaava Justin Trudeau Canadami indianerit høvdingiisa kattuffiannik sapaatit-akunneranni uani ataatsimeeqateqarpoq, oqalugiarnerminilu indianerit kisiisa pinnagit aamma naggueqatigiit inuit metisillu sammivai.
Oqalugiarnermini qineqqusaarnermi neriorsuutimi piviusunngortinnissaat ilaatigut eqqartorpaa.
Naggueqatigiit inuit, indianerit metisillu pisinnaatitaaffiisa Canadap tunngaviusumik inatsisaani allattorneqarsimasut kusassaataaginnannginneri Trudeaup naqissuserpaa, pisinnaatitaaffiillu Canadap pinngitsoorani qulakkeerniartariaqarai oqaatigalugu.
AAMMA ATUARUK Canadami general-guvernøri pissutsinik iluarsiinissamik neriorsuuteqartoq
Ilinniartitaanerup iluani aningaasaliissutit amerlineqarnissaannik ilaatigut neriorsuuteqarpoq, nunap inoqqaavi naligiissitaallutik siunissaminnut pitsaanerusunik periarfissaqarnissaat qulakkeerniarlugu.
Aammattaaq naalakkersuisuusarsimasut inatsisiliaat nunap inoqqaavinik assigiinngisitsiffiusut aporfissalersuisullu allanngortikkusuppai.
- Maannamit suleqatigiittut sulineq ingerlatissavarput, Trudeau taama naggasiivoq.