Canadami general-guvernøri pissutsinik iluarsiinissamik neriorsuuteqartoq
Canadami naalakkersuisut nutaat atuutilernerannut atatillugu politikkikkut ukiuni tulliuttuni anguniagaat pillugit general guvenøri, David Johnston, nunap ministeriunertaava Justin Trudeau sinnerlugu Canadap Inatsisartuisa tallimanngormat ammaanersiorneqarneranni oqalugiarpoq.
Naggueqatigiinnullu Inunnut, metisinut eqqillinullu tusarluarnartoqarpoq. Tassami Canadami naalakkersuisut naggueqatigiinnut taakkununnga atassuteqarnetik nukittorsarniaraat, inuiaqatigiittullu naligiisitaasutut, naalatsituunngitsorlu, pineqartalernissaat oqalugiaammi neriorsuutigineqarpoq.
Aamma atuaruk Canadap inooqqaavisa angutitaat aamma navianartorsiorput
Oqalugiaammi aamma neriorsuutigineqarpoq, Inuit, eqqillit metissillu arnartaasa amerlasuut tammartarnerat toqutaasarnerallu pillugit nuna tamakkerlugu misissuisoqarniartoq. Naalakkersuisut siuliisa atuutinnerminni taamaalinissaminnut soqutiginninngillat.
Aamma nunap inooqqaavinut Canadami ilinniartitaaneq pitsanngorsarneqassasoq neriorsuutigineqarpoq.
Ilumoortussaq Saammaateqatigiinnissarlu pillugit Isumalioqatigiissitap innersuussutai 94-it atuutilertinneqassasut Justin Trudeaup ilaatigut qineqqusaarutigaa, neriorsuullu taanna aamma piviusunngortinneqarniarpoq.
Aamma atuaruk Inuit Labradorimiittut utoqqatserfigineqarnissaat piareersarneqarpoq
Taamaalillunilu Naalagaaffiit Peqatigiit Nunat Inooqqaavi pillugit inuttut pisinnaatitaaffinnut aalajangersagaat Canadami atuutilerneqassaaq. Aalajangersagaq taanna atsiorneqarnikuugaluarpoq, atuutilersinneqarnikuunanili.
Tamannalu inunnit, eqqillinnit metissiniillu nuannaarutigineqarpoq.