Canadap inooqqaavisa angutitaat aamma navianartorsiorput
Inuit, eqqillit metisillu arnartaasa tammartarnerat toqutaasarnerallu pillugit oqallittoqaraangat nunap inooqqaavisa angutitai arnartaatuulli eqqaaneqartigineq ajorput.
Taamaattoq Inuit, eqqillit metisillu angutitaata nakuuserfigineqarnissaminnut toqutaanissaminnullu arnartamisulli navianartorsiortigisut erserpoq.
Arfineq marloriaammik navianartorsiornerusut
Eqqillit toqutaanissaminnut Canadamiunit arfineq marloriaammik navianartorsiornerusut, eqqilik ilungersuutigisamik ingerlatsisoq, Lenard Monkman, CBC Newsimut oqarpoq.
Lenard Monkman aamma oqarpoq, Canadap paarnaarussiviini arlaqartuni eqqillit amerlanerusartut, inuusuttortaallu amerlasuut ilaqutariinni piitsuni atugarliortunilu peroriartortartut.
Aamma Inuit, eqqillit metisillu angutitaasa kinaassuserfigineqartartut, tamannalu pissutigalugu nakuusertarlutik. Politiillu inuusuttut taamaattut illersornissaannut kajumissuseqarpallaarneq ajortut.