VIDEO Campus Kujalleq uranimut akuersaarpoq
Pisorpassuaqarpoq ilinniartullu akornanni Kuannersuarni aatsitassarsiulernissamut pilersaarut pillugu isummat sakkortuumik assortuupput.
Inuiaqatigiinnimi isummersortut assigalugit kujataani ilinniarnertuunngorniarfimmi aamma isummat assigiinngeqaat.
- Siullermik naaggaartorujussuugaluarama. Kisiat paasisakka annertusiartortillugit angertunngorama, Emma Birkholm, Narsaq, KNR-imut oqarpoq.
Aamma atuaruk Qaqortumi GU-rtut Kuannersuit sapaatip-akunnerata massuma ingerlanerani sammissavaat
- Uanga akerlerilluinnarpara. Meeqqama siunissaat aamma eqqarsaaatigisariaqarakku, Arnavaraq Heilmann, Qaqortoq, KNR-imut oqarpoq.
Kuannersiuarni aatsitassarsiulernissamut akuersaartut aningaasat suliffissallu tunngavilersuutigaat.
Uranip ulorianartuunera akerliusut tunngavilersuutigaat.
- Uanga uku saqqummiunneqarneq ajortut nassaarigakkit. Saqqummersitat 1960-miit 2005-ip tungaanut nunarsuaq tamakkerlugu sapusiat ajutoornikut allattorsimaffiat. Uani takuneqarsinnaavoq suna ajoqusiisimanersoq, taavalu inuit qassit toqusimanersut, Arnavaraq Heilmann nassuiaavoq.
Inuusuttut aatsitassarsiornissamut akuersaaleraluttuinnartut
Aningaasat isertitassarpassuit suliffissallu. Tamakkuupput Kujataani ilinniarnertuungorniat Kuannersuit pillugit sammisaqarmata naatsorsuusiarineqarsimasut ilaat. Taamaammat inuusuttut amerliartuinnartut Kuannersuarni aatsitassarsiulernissamut akuersaaleraluttuinnarnerat maluginiarneqarpoq.
Aamma atuaruk Kalaallit Nunaat uranimik piiaasinnaanngulerpoq
Kuannersuarni aatsitassarsiortoqalissagaluarpat tamanna ukiuni 37-ini sivisussuseqassasoq Campus Kujallermi ilinniartut sammisaqaramik paasisaasa ilagaat.
- Ukiut 37-it 131 milliarder koruunit isertissasut naatsorsorparput, Ane Dorthe Kaspersen, Campus Kujallermi ilinniartoq KNR-imut oqarpoq.
Aningaasat isertinneqarsinnaasut amerlassusaat ilinniartut tutsuiginartuusoraat.
Aamma atuaruk Uranimik piiaaneq kalaallit kisimik oqartussaaffiginngilaat
Kuannersuarnilu aatsitassasrsiortoqalissagaluarpat ukiualuit qaangiuppata aatsaat iluanaarutissat takkussuutilissasut ilinniartut aamma naatsorsuusiorsimapput.
- Aatsaat ukiut arfineq pingajussaat qaangiuppat sinneqartoorutit ingerlalissapput, Ane Dorthe Kaspersen nasuiaavoq.
Tamanna ilinniartut tupaallaatigaat.
Ilinniartut apersueqattaarput
Campus Kujallermi ilinniartut Kuannersuit pillugit sammisaqaramik aamma tusagassiortoqarput.
- Uagut sapaatip akunnera una tusagassiortutut sulivugut. Inuit apersukkagut apersoqattaarpagut piiaasoqalissappat qanoq isuamaqarfigineraat, Karl Peter Motzfeldt, Campus Kujallermi ilinniartoq KNR-imut oqarpoq.
Aamma atuaruk Uranip nunatsinneersup sakkussiornermut atorneqannginnissaa anguniarneqarpoq
Facebookimi Kuannersualerngusaaneq iserfigalugu isumasiorneqartut isumaat tusarnaarneqarsinnaapput.
Ilinniartullu apersueqattaarneranni apersorneqartut amerlanerit Kuannersuarni aatsitassasrsiulernissaq akuersaaraluttuinnaraat maluginiarneqarpoq.
Aamma atuaruk Ilisimatooq: Uranimut naaggaarluinnarnermut politikkeqarsimanngilaq