Uranip nunatsinneersup sakkussiornermut atorneqannginnissaa anguniarneqarpoq
Danskit naalakkersuisui siunnersuuteqalersaarput aappaagu februaarimi aalajangiiffigineqartussamik, tassalu qaqotigoortunik aatsitassanik uranitalinnik naalagaaffeqatigiit iluanni qalluinermi, uranip tunisassiarineqarnerani, issuaaneq aallartippoq "- tamanna sakkussiornermut akuerisaanngitsumut imaluunniit pinerliiniat urani atorlugu sakkussiornerinut atorneqartassanngitsoq", issuaaneq naavoq.
Taama siunnersuuteqarneq, Folketingimi ataatsimiinnerit ullumi aallarteqqinneranni, Venstret siunnersuutaat taamaattoq saqqummiunneqarpoq.
Siunnersuummi pineqartoq tassaavoq, Kalaallit Nunaanni uranimik qalluinermi inatsisissamik nutaamik siunnersuuteqarneq taasamik, "- atomi atorlugu nukissiuutit pillugit isumannaatsumik tamassuma nakkutigineqarnissaa". Tassani urani pineqartillugu, nunat tamalaat akornanni isumaqatigiissut Danmarkimit isumagineqarluni malinneqarnissaa siunertaalluni.
Taama siunnersuuteqarneq pivoq, Nunatsinni urani pillugu 2013-imi oqallinnermi uranitalinnik aatsitassarsiortoqanngilluinnarnissaanik isummersorfigineqareersorlu aamma uranip qallorneqarnissanik Inatsisartut aalajangeereersullu.
Taama Inatsisartut aalajangiinerannut tunuliaqutaavoq, nalornissutigineqarmat uranimik tunisassiorneq aamma qalluineq Kalaallit Nunaannit qanoq annertutigisumik namminersuutigineqassanersoq.
2013-imi danskit naalakkersuisunit, Helle Thorning-Schmidtimit siuttuuffigineqartumit taamani nassuerutigineqarpoq, Namminersortuunerup inatsisiliorneqarnerani allassimasoq malinneqassasoq, tassa tamanna Kalaallit Nunaata nammineq isumagisassarigaa.
Taamali oqareerluni aamma naqissusiivoq, urani pillugu Kalaallit Nunaata qanoq iliuuserisai Danmarkimit suli akisussaaffigineqartut.
Tamannalu tassa pillugu, Helle Thorning-Schmidt aamma naqissuseeqqilluni, suliaq pillugu Danmarki Kalaallit Nunaallu qanimut suleqatigiittut, tassami suliaq annertummat tamannalu silatusaartumik suliarineqartariaqartoq naqissuserlugu.
