Qaqortumi GU-rtut Kuannersuit sapaatip-akunnerata massuma ingerlanerani sammissavaat
Narsami qaqqap oqallisaaqisup geologiia, tassanilu aatsitassarsiornerup kingunerisinnaasai ilaatigut pillugit ilinniartut 250-it sinnerlugit ullumiminngaanniit sapaatip akunnera naallugu saqqummiuffigineqartassapput.
Aamma atuaruk GME inaarutaasumik qinnuteqaateqarnissaminut piareerpoq
Aatsitassarsiornissamut isumaqataassut akerliusullu aamma oqallitsinneqassapput, tassanilu borgmesteri Jørgen Wæver Johansen, Siumut, akuersisutut apeqqarissaarfigineqassaaq, akerliusullu sinnerlugit Lisbeth Søvdahl Petersen, Inuit Ataqatigiit, apeqqarissaarfigineqassalluni.
Sapaatip akunnerata ingerlanerani aamma suleqatigiilluni suliaqartitsisoqassaaq, ilaatigut kemiimik misiliititsisoqassalluni, aningaasatigullu sunniutaasinnaasunik misissuititsisoqassalluni. Sammisaqartitsinermi aamma isiginnaartitsisoqassaaq, Narsaq 2050: Siunissamut takorluukkat marluk-mik taaguuserneqartumik.
Aamma atuaruk Uran pillugu akerliussutsimik takutitsisut: Paasissutissat isertuunneqarput
Sapaatip akunnerani immikkut sammisaq tallimanngorpat tamanut ammatitsinikkut naggaserneqassaaq, tassanilu gruppit tamarmik sapaatip akunnerata ingerlanerani suliarisimasatik saqqummiutissallugit.
Kollegianilu najugallit aamma iffiussapput, takuniaasut "yellow cake"-imik sukkulaannillu qaqutigoortunik misiliisinnaaniassammata, Campus Kujallermi forstanderi Steffen Lund quujasaarilluni neriorsuivoq.