Cairn immami itisuumi qillerissaaq
Namminersorlutik Oqartussat siorna neriorsuutigigaluarpaat, Nunatta eqqaani qillerinerit, BP-p Mexicop Kangerliumanersuani qillerineri malinnagit, immami ikkattumi pissasut. Ukiormannali Cairn Energy 650 meterinit itinerusumi qillerinissaminik akuersissuteqarfigineqartoq, aviisimi Politikenimi ullumi allaaserineqarpoq.
Tamanna ilaatigut kommuneqarfiit kattuffianni KANUKOKA-mi ernumanartoqartinneqarpoq.
- 2011-mi itinerungaatsiartumi qillerisoqartussaavoq, uuliamillu mingutsitsisoqassagaluarpat unitsinniarnissaa teknikkikkut pisariunerussalluni, tusarniaanermut akissummi kommunit kattuffiat ilaatigut taama allappoq.
Taamaattorli isumannaallisaanerup sakkukinnerulerneranik oqalunneq, Aatsitassanut Ikummatissanullu Pisortaqarfiup ilumuunnginnerarpaa. Pisortap Jørn Skov Nielsenip innersuussutigaa, nunani tamalaani malitassat malillugit akuersissuteqartoqarmat, tamatumalu peqatigisaanik isumannaatsuunissamut avatangiisinullu immikkut piumasaqaateqarnerarlugu.
Aamma Namminersorlutik Oqartussat qillerinermut ataatsimut akuutissanik sakkortuunik 45 tonsinik eqqaanissamut akuersissuteqarnerat, KANUKOKA-p avatangiisinillu illersuiniaqatigiiffiup Greenpeacep isornartorsiorpaat. Norgemiut isumannaallisaanissamut piumasaqaataasa sakkortuut, immami sikulimmi qillerinermi atorneqalersut, kalaallit oqartussaasuinit malinneqannginnerat Greenpeacep aamma isornartorsiorpaa.
