Pele Broberg Jens Napaattoorlu inatsisartunut qinersisoqarnerani.

Brobergip assuarliornerata kingorna: Naleraq naalakkersuisuni ilaasortaaginnarusuppoq

- Uagut inuiaqatigiinni allannguerusulluta sassarpugut. Inuit Ataqatigiit allannguerusuttut peqatigerusuppagut, Jens Napaattooq oqarpoq.

Naleqqap politikikkut oqaaseqartartuata, Jens Napaattuup partiini naalakkersuisoqatigiinni ilaaginnartutut isigaa.

Tamanna Pele Brobergip oqallinnermik sapaatiummat aallartitseqqinnerata kingorna oqaatigaa. Taassumami oqaaseq ”naalagaaffeqatigiinneq” atorunnaarniarlugu, oqaaserlu danskit Kalaallit Nunaannut naalagaaffiginninnerannut patsisaasoq aviisimut Berlingskemut oqaatigaa.

Berlingskilli Naleqqamit politikerip oqaaserisaanik issuaanera taannaannaanngilaq.

AAMMA ATUARUK Brobergip oqaaseqarnerata aqaguani: Múte B. Egede oqaaseqanngilaq

Pele Brobergimmi nunatsinni innuttaasut siunissami taasitinneqassagaangamik kikkut assersuutigalugu nunatta namminiilivinnissaanut taasititsinermi taaseqataasinnaassanersut oqallisigineqartariaqarsoraa.

Naalakkersuisoqatigiit

Inatsiartuni qinigaaffiit 31-upput. 

Inuit Ataqatigiit aqqaneq-marlunnik qinigaatitaqarput. 

Naleraq sisamanik qinigaatitaqarpoq. 

Partiit marluk taamaalillutik ataatsimik amerlanerussuteqarput. 

Partii ikorfartortaasoq Atassut Inatsisartunut marluinnarnik qinigaatitaqarpoq.

- Thailandimiut, Danmarkimeersut, tuluit, Frankrigimeersut, Spaniamiut, allalluunniit nunatsinni najugallit nunatta namminiilivinnissaanut taasititsinermi peqataanissamut pisinnaatitaaffeqanngitsut ersarippoq. Tassa naggueqatigiit inuit. Nuussimasutut qanoq misigisimaneq isumaqarnerlu taasinissap oqallisigineqarnissaani matumani pingaaruteqanngillat, Pele Broberg Berlingskemut oqarpoq.

Sooq oqallisaassava? Sooq Kalaallit Nunaanni najugaqartut tamarmik taasisinnaassanngillat?

- Nunatsinnimmi nunasiaateqarsimasut nunatsinniiginnarusunnerlutik taasisussaanngillat, Pele Broberg oqarpoq.

Atassut nikititerisoqartitserusuttoq

Tamanna pissutigalugu Múte B. Egedep (IA) Pele Broberg naalakkersuisutut tunuartissagaa Atassutip piumasaraa. Demokraatillu Brobergip oqaaserisai ”isumaqanngilluinnarnerarpaat”.

Múte B. Egede Naalakkersuisut siulittaasuatut siullerpaamik Pele Brobergip taasisinnaanermut isumaanut akerliliingaatsiarpoq.

Nalerarli aalajangiusimavoq – taakku naalakkersuisunit tunuarniarlutik eqqarsaateqanngitsut, politikikkut oqaaseqartartoq, Jens Napaattooq oqarpoq.

AAMMA ATUARUK Demokraatit om Broberg-udtalelse: Det er fuldstændig absurd

Naleqqamit naalakkersuisoqatigiinniiginnarniarlusi eqqarsaatigaasiuk?

- Uagut inuiaqatigiinni allannguerusulluta sassarpugut. Inuit Ataqatigiit allannguerusuttut peqatigerusuppagut. Kisianni upperaarput, Inuit Ataqatigiit aamma nunatta namminiilivinnissaa anguniaraa. Tamaammat aaqatigiilluta assigiinngissuterput sanngeequtigalugu nukittoqqutigalugulu ingerlaqqinnissarput uagut kissaatigivarput.

Múte B. Egede Pele Brobergip oqaaserisaanut atatillugu naqqiissuteqarpoq. Tamanna Naleqqamit qanoq tiguneqarpa?

- Tamanna oqaloqatiginninnissamut soorunami pissutissaavoq. Maanna tusagassiutinut nalunaarummik erseqqissaassummik suliaqartoqaleruttorpoq. Soorlu Pele taamaalioreersoq, Jens Napaattooq oqarpoq.

Siulittaasoq akerliliingaatsiartoq

Inuit Ataqatigiit ippassaq oqaaseqanngillat. Pele Brobergip Berlingskemut oqaaserisai naalakkersuisoqatigiinnut Naleraq pissutigalugu amerlanerussuteqaqqartunut kinguneqartitsissutaassanersut KNR-ip apeqqutigerusukkaluarpaa.

Siulittaasorli Múte B. Egede naalakkersuisuminut siullermeertumik sapaatiummat akerliliivoq. Tamanna allakkatigut sakkortuumik oqaaseqarneratigut pivoq:

- Nunatsinni innuttaasut inuiaassuseq aallaavigalugu assigiinngitsumik pineqarnissaat naalakkersuisut politikkerinngilaat.

AAMMA ATUARUK Politikkimut malinnaasoq: Naalakkersuisuni sakkortuumik toqqissiviilliortoqarpoq

- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq, naqqiummi ilaatigut atuarneqarsinnaavoq.

Allakkatigut naqqiuteqarneq tamaat uani atuarneqarsinnaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat