Demokraatit Brobergip oqaaseqarneranut: Ajorluinnarpoq

Pele Brobergip Kalaallit Nunaata namminiilivinissaa pillugu innuttaasunik taasisitsisoqalerpat inuiannit inunnit kingoqqisut kisimik taasitinneqartarnissaanik oqaaseqarnera Demokraatinit sakkortuumik akerlilerneqarpoq.
Kalaallit Nunaanni najugaqaruit, kalaallisut innuttaasutut nalunaarsorsimaguit aamma inuiaqatigiinnut kalaallinut tapersersueqataaguit, taava soorunami taasisinnaatitaassaatit, Jens Frederik Nielsen, Demokraatit siulittaasuat, taama oqarpoq. Assi © : KNR
Allattoq Jaaku Lyberth, Anders Dall
septembarip 21-at 2021 05:42

Ajorluinnaqqinnaarpoq innuttaasut inunnit kingoqqisut kisimik Kalaallit Nunaata namminiilivinissaa pillugu innuttaasunik taasisitsisoqalissangaluarpat kisimik taasitinneqarunik.

Taama Demokraatit siulittaasuat, Jens Frederik Nielsen, isumaqarpoq, taassumalu Pele Brobergip Berlingskemut oqaaserisai sakkortuumik isornartorsiorpai.

Pele Brobergip, nunanut allanut naalakkersuisuusup, Kalaallit Nunaata namminiilivinissaa pillugu innuttaasunik taasisitsisoqalissangaluarpat kikkut taasitinneqassanersut pillugit oqallissaarivoq. Pele Brobergillu oqarnera naapertorlugu innuttaasut inunnit tunuliaqutallit kisimik taasitinneqartariaqarput.

Taama oqarnermi kingorna Naalakkersuisut siulittaasuannit, naalakkersuisooqatigiinnut partiimit tapersersortaasumit Atassummit, aamma illuatungiliuttunit, Demokraatinit, isornartorsiorneqarpoq isumassarsiaanullu mianersoqqusisoqarluni.

- Inuiaqatigiit kalaallit, ameq qanorluunniit qalipaateqaraluarpat, taasippata namminiilivinnissamut, tassanngaanniit allanngorsinnaavarput, Jens Frederik Nielsen oqarpoq.

Naqqiut aamma tapersersortaasut kamattut

Naalakkersuisut siulittaasuat Múte B. Egede sapaammi naqqiuteqarpoq naqissusiillunilu oqarluni nunatsinni innuttaasut inuiaassuseq aallaavigalugu assigiinngitsumik pineqarnissaat naalakkersuisut politikkerinngilaat.

Atassutillu siulittaasua Aqqalu Jerimiassen KNR-imut ataasinngornermi oqarpoq Pele Broberg nunanut allanut tunngasunut akisussaaffeqarnissaminut tulluanngitsoq.

AAMMA ATUARUK Atassut: Múte Naalakkersuisuni maanna nikititerissaaq

Demokraatiniillu oqaatigineqartut naapertorlugit nunatsinni najugalittut nalunaarsorneqarsimasut tamarmik taasisinnaasariaqarput.

- Assigiinnarpaa oqarutta USA-mi qernertumik amillit taaseqqusaanngitsut. Ajorluinnarpoq. Tamat oqartussaaqataanerisa ataani inuunitsinni, inuiaqatigiit kikkuungaluarunilluunniit, angisuut mikisulluunniit, qernertumik imaluunniit qaqortumik ameqarpata, tassa qanorluunniit isikkoqaraluarpata pisinnaatitaaffeqarput. Taakkualu illersugassaraagut, Jens Frederik Nielsen oqarpoq.

Demokraatit: Suleqatigiinnissarput pisariaqarpoq

Pele Borberg Berlingskemit apersorneqarnermini oqaaseq “naalagaaffeqatigiinneq” atorunnaarniarlugu oqaatigaa, taassumami oqarnera naapertorlugu oqaaseq danskit Kalaallit Nunaannut naalagaaffiginninnerannut patsisaavoq.

Jens Frederik Nielsenilli isumaqatiginngilaa:

- Eqqaamasariaqarparput ukiorparpassuarni suleqatigiinneq ingerlanikuummat. Aamma akisussaaffiit 33-it naalagaaffimmiit suli akisussaaffigineqarput. Soorunami suleqatigiinnikkut taakkua ajunnginnerpaamik qaangerneqartariaqarput, oqarpoq nangillunilu:

- Taamaammat suleqatigiinneq pitsaasoq, ukiorpassuarni pitsaasumik ingerlanikoq, suli attattariaqarparput. 

 

AAMMA ATUARUK Múte B. Egede Pele Brobergip oqaasiinut naqqiuteqartoq

KNR-imit Pele Broberg oqaaseqartinniaraluarparput, taannali KNR.gl-imut oqaaseqarusunngilaq. Naalakkersuisut siulittaasuat KNR-imut suliaq pillugu ataasinngornermi aamma oqaaseqarusunngilaq.

Aamma atuaruk