Brobergip oqaaseqarnerata aqaguani: Múte B. Egede oqaaseqanngilaq
Nunanut allanut tunngasunuut naalakkersuisoq Pele Broberg qaartartuissuarmik ilumut ippassaq qaartitseqaaq
Pele Brobergip oqaaseq “naalagaaffeqatigiinneq” atorunnaarniarlugu, oqaaserlu danskit Kalaallit Nunaannut naalagaaffiginninnerannut patsisaasoq aviisimut Berlingskemut oqaatigaa.
- Uannit isigalugu naalagaaffeqatigeeqanngilaq, Pele Broberg oqarpoq.
Taassuma ”danskit naalagaaffiat” atorusunneruaa, pissutigalugu tassuuna kikkut pissaaneqartuunerat ersarimmat.
Berlingskilli Naleqqamit politikerip oqaaserisaanik issuaanera taannaannaanngilaq.
Atassut nikititerisoqaqqusisoq
Pele Brobergip nunatsinni innuttaasut siunissami taasitinneqassagaangamik kikkut assersuutigalugu nunatta namminiilivinnissaanut taasititsinermi taaseqataasinnaassanersut oqallisigineqartariaqarsoraa. Tassanilu naggueqatigiinnik inunnik tunuliaqutaqartut kisimik taasisassasut, Broberg isumaqarpoq.
- Nunatsinnimmi nunasiaateqarsimasut nunatsinniiginnarusunnerlutik taasisussaanngillat, Pele Broberg oqarpoq.
AAMMA ATUARUK Politikkimut malinnaasoq: Naalakkersuisuni sakkortuumik toqqissiviilliortoqarpoq
Tamanna Atassutip Demokraatillu isornartorsiorpaat. Atassutip Múte B. Egede Naalakkersuisut siulittaasuatut iliuuseqarluni Pele Broberg naalakkersuisutut atuuffimmit peersissagaa piumasaraa – maannakkullu iliuuseqartoqarluni.
Demokraatit Brobergip oqaaserisai ”isumaqanngilluinnarnerarpaat” oqarlutillu:
- Inunnik eqimattanut agguaaneq inuiaassutsimillu agguaaneq qanga pissusipalaami iliuuserineqartartuuvoq.
Brobergip oqaaserisai Múte B. Egedemit oqaaseqartoqarneratigut Inuit Ataqatigiit ippassaq siullermik sakkortuumik akerlilerneqarput.
Múte B. Egede akerliliisoq
Tassanilu Múte B. Egedep Pele Broberg isumaqatiginngilluinnarpaa. Pele Brobergillu Berlingskemut oqaaserisai Naalakkersuisut politikkiannut naapertuutinngilluinnartut, Naalakkersuisut siulittaasuata oqaatigaa.
Naalakkersuisulli siulittaasuat ullumikkut oqaaseqanngilaq. KNR-ip Múte B. Egede ulloq naallugu oqaaseqartinniarsarigaluarpaa. Pele Brobergip naalagaaffeqatigiinnermut inuillu aalajangersimasumik inuiaassuseqartut kisimik taasisinnaanissaannut isumaqarnera qanoq kinguneqarnersoq paaserusukkaluarparput.
Aammattaaq Atassutip piumasaqarnera malillugu Broberg naalakkersuisoqarfimmit tunuartillugu Naalakkersuisuni nikititeriniarnersoq paaserusukkaluarparput.
AAMMA ATUARUK Atassut: Múte Naalakkersuisuni maanna nikititerissaaq
Aamma Pele Brobergip oqaaserisai nunani allani inuit nunatsinnut isiginninnerannut qanoq sunniuteqarsorineraa paaserusukkaluarparput.
Akissutersiniarnerli iluatsinngilaq.
Namminersorutik Oqartussat allakkatigut oqaaseqaammut ippassaq nassiunneqartumut innersuussuteqaannarput.
Múte B. Egede allakatigut tassani ima oqarpoq:
Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq.
Innuttaasullu nunatsinni assigiinngitsumik pineqarnissaat, taasinernut allanullu mattunneqarnissaat Naalakkersuisut Naalakkersuisooqatigiillu isumarinngilaat.
Allakkatigut oqaaseqaataa tamaat uani atuarsinnaavat.
