Borgmesteri: Tamakkiisumik taperserneqarpunga
Charlotte Ludvigsen akiuussutissalerneqarneq pillugu suliap kingorna Kommuneqarfik Sermersuumi borgmesteritut atuuffimmiiginnassaaq.
Partiit tamarmik tassunga tatiginnipput, tamanna kommunalbestyrelsimi gruppit siulittaasuisa tamarmik ataatsimut oqaaseqaataanni allassimavoq.
AAMMA ATUARUK Nuummi akiuusserneqarniarluni qaangiisoqareersorlu: Charlotte Ludvigsen borgmesteritut atuuffimminiiginnassaaq
Borgmesterip atorfillillu pingasut juulip ulluisa 22-anni siuleriaattorpassuit qaangiinnarlugit akiuussutisserneqarnerat pillugu suliaq taamaalilluni inernilerneqarpoq.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Kommuni nammineerluni suliamik eqqartuussissuserisunut misissuisitsisuuvoq, taannalu kommunalbestyrelsimit ippassaq unnukkut oqallisigineqarluni. Ataatsimiinneq ilaasortat tamarmiullutik Charlotte Ludvigsenip borgmesteriuinnarnissaannik tapersiinerannik inerneqarpoq.
- Borgmesteri kommunalbestyrelsimut utoqqatseqqippoq. Utoqqatsernera partiinit tamanit tusaatissatut tiguneqarpoq, ataatsimoortumik oqaaseqaammi allassimavoq.
Kommune isornartorsiorneqartoq
Eqqartuussissuserisut misissuinermini marlunnik inerniliissuteqarput: Kommunip ingerlatsinermut ileqqorissaarnissaq suliami unioqqutippaa – tassa ima paasillugu ileqqorineqartussat malillugu ileqqulersortoqarsimanngilaq.
Borgmesterip atorfillillu pingasut ”atuuffitsik pissutigalugu imminnut iluaqutissarsillutik” akiuussutissamik allanit silami siualummi utaqqisunit siulliullutik kapitinnerat pissutigalugu ileqqorissaartoqanngilaq. Siuleriiaattorpassuarnit amerlasuut akiuussutissat naammannginnerat iluatsitsinatik angerlaannarput.
AAMMA ATUARUK Charlotte Ludvigsen akiuussuserneqarnissamut qaangeraanini pillugu: Ajuusaarpunga - utoqqatserpunga
- Akiuussuserneqarsimaninnut advokatiminngaaniit misissuititsivugut taassumalu aamma takutippaa pissuserissaarnissamut ileqqoreqqusat taakku unioqqutinneqartut. Taava kisianni aamma uani ersersinneqarpoq uanga unioqqutitsillunga pissaanermik atornerluinngitsunga, tamaattumillu aamma partiiniit tamanit tatigineqarlunga, Charlotte Ludvigsen KNR-imut oqarpoq.
Innuttaasunut ullumikkut oqaasissaqarpit?
- Tassami una pissuserissaarnissamut ileqqoreqqusaq unioqqutinnikuuara, aamma aallaqqaammulli avammut oqariartornikuuvunga utoqqatserlunga taamaasiorsimagama, borgmesteri oqarpoq.
- Aammalu taanna qujarutigivara innuttaasunit paasinnittoqarmat. Aamma oqaatigerusuppara kukkussutigisara ilinniutaavoq. Taamaattumik taamatut pissuserissaarnissamut ileqqoq, immaqaluunniit atorfiga atornerlunnissaa taamatut siunertaqannginnami, taanna qularissanngikkaat.
Siumut: Det sidste ord er ikke sagt
KNR-ip akiuussutissalersuinermi siuleriiaattunik qaangiisoqarnera saqqummiummagu isornartorsiuisut ikinngillat.
Demokraatit siulittaasuata, Justus Hansenip borgmesteri naliliisinnaalluannginnerarpaa. Siumumiillu Inga Dora G. Markussen ima oqarluni:
- Akiuussusertinniarluni ikusikkaatut pissusilersortoqarpoq, tamannalu pissusissamisuunngilaq.
AAMMA ATUARUK Akiuussusersuinermut ataqatigiissaarisoq: Borgmesteri atorfilittallu salliullutik akiuussuserneqarniassagamik sioorasaaripput
Aamma peqqissutsimut naalakkersuisup, Kirsten Fenckerip (Naleraq) suliaq akuersaarneqarsinnaannginnerarpaa.
Kommuneqarfik Sermersuumi borgmesterip tullersortaa Justus Hansen suliamut atatillugu oqaaseqarusunngilaq. Martha Abelsenili Siumup gruppiata siulittaasua oqaasissaqarpoq. Taassuma oqarnera naapertorlugu kukkusoqaqqinnginnissaanik eqqaasinneqartuaannassaaq - borgmesterillu siunissami ileqqorissaartumik pissusilersuuteqarnissaa naatsorsuutigaa.
- Uteqqiattumik uterfigineqartuaannassaaq. Borgmesterimik taamannak siuttoqartussaavugut allanut tamanut ileqqorissaarnermik takutitsisumik, Martha Abelsen oqarpoq.
Charlotte Ludvigsenilu taama kukkussuteqaqqissanngitsoq oqarluni.
- Soorunalimi naliginnaasuussaaq ulluinnaassaaq, ileqqorissaarnissaq pingaartinneqartussaavoq. Innuttaasunik sullissivugut, innuttaasut aningaasaataat aquppagut, innuttaasut oqaloqatigisassarivagut, innuttaasut qanimut tikillugit kiinnertarnissatsinni ileqqorissaarneq sakkussaavoq pitsaanerpaaq.
