Naalakkersuisoq borgmesterip akiuussutisserneqarnera pillugu: Akuersaarneqarsinnaanngilaq
Akuersaarneqarsinnaananilu uparuagassaavoq.
Peqqinnissamut naalakkersuisoq, Kirsten Fencker (N) borgmesterip Charlotte Ludvigsenip (IA) inuit akiuussuserneqarnissaminnut siuleriiaallutil utaqqisut sanioqqutiinnarlugit nammineq kapitinnera pillugu oqarpoq.
- Akiuussutissalersuinermi inuiaqatigiinni sanngiinnerusut salliutinneqartussaapput, taamaammallu erseqqissaassutigineqassaaq, allatut pissusilersorsimaneq akuersaarneqarsinnaanngimmat. Pisimasorli ajuusaarnarpoq, allanngortinneqarsinnaanngilarli, Kirsten L. Fencker sermitsiaq.ag-mut allappoq.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Namminersorlutik Oqartussat akiuussusersuinermut ataqatigiissaarisuat, Anna Wangenheimip Charlotte Ludvigsenip taassumalu Kommuneqarfik Sermersuumi atorfilittai pingasut akiuussutissalerneqarnissaminnut siorasaarisimanerat KNR-imut oqaatigereeraalu suliaq sisamanngornermi saqqummerpoq.
Atorfilittammi akiuussutisserneqanngikkunik Nuummi atuarfiup silataani akiuussuserneqarniartut siuleriiaannerannik nakkutiginninnermi ikiuunnianngillat.
Borgmesterip pisoq utoqqatsissutigigaa
Charlotte Ludvigsenip siorasaarisoqarsimaneraasoqarnera itigartitsissutigaa – taassumalu ”paatsoortoqarsimasoralugu”.
Tamanna kommunip suliffeqarfimmi kiffartuussinermut pisortaanerigallagaata, Gerth Jacobsenip taperserpaa.
Ludvigsenilli siuleriiaattunut akiuussutissat naammannginneranni amerlasuut siallertumi akunnerpassuarni utaqqereerlutik angerlaannarfigisaanni qaangiisimanini nassuerutigaa.
AAMMA ATUARUK Akiuussusersuinermut ataqatigiissaarisoq: Borgmesteri atorfilittallu salliullutik akiuussuserneqarniassagamik sioorasaaripput
- Tassami ajuusaartorujussuuvunga taamatut iliorsimagama aamma kingumut utertissinnaasuugukku taamaasiussagaluarpunga nalunngitsuugukka akiuussutissat naammassimanngitsut. Kisianni pisoq allanngortissinnaanngilara taannalu innuttaasunut utoqqatsissutigerusuppara ullormi taamatut pisoqarneranut, borgmesteri KNR-imut sisamanngormat oqarpoq.
Soraartoq
Akiuussusersuinermut ataqatigiissaarisup, Anna Wangenheimip pisoq sulisitsisuminut tassa Peqqinnissamut Naalakkersuisoqarfimmut nalunaarutigaa.
Naalakkersuisup Kirsten Fenckerip borgmesterip qaangiiginnarnera pitsaanngitsoq isumaqatigaa.
- Pisimasoq ilisimaneqalerniariartoq Naalakkersuisut qisuariarlutik Kommuneqarfik Sermersuumut uparuaateqarsimapput, Kirsten Fencker sermitsiaq.ag-mut allappoq.
AAMMA ATUARUK Inuit Charlotte Ludvigsenip qaangeraanera pillugu: Pissusissamisuunngilaq
Anna Wangenheim akiuussusersuinermut ataqatigiissaarisutut qaammat ataaseq sioqqullugu soraarniuteqarpoq. Taanna aggustimi aamma sulisussaagaluarpoq.
Anna Wangenheim siusinnerusukkut aamma peqqinnissamut naalakkersuisuusimavoq.
