Inuit Charlotte Ludvigsenip qaangeraanera pillugu: Pissusissamisuunngilaq
Nuummi Inussivimmi akiuussutissamik ullumi kapuisoqaqqippoq. Uanilu siuleriiaattut pisarnertut amerlapput.
Borgmesterili allatulli sapaatip akunnerata siuliani siuleriiaattuniissimanngilaq.
Suliaq Charlotte Ludvigsen pillugu:
Nuummi atuarfimmi USK-imi sapaatip-akunnerata siuliani akiuussusersuisoqangaatsiarpoq.
Matut suli ammarneqanngitsut siuleriaattorpassuanngoreerput. Kapitikkiartortulli ilaat siuleriiaattuniinngillat.
Kommuneqarfik Sermersuummi borgmesteria, Charlotte Ludvigsen (IA) atorfilittani pingasut peqatigalugit akiuussusersuiffiusumut USK-imut matut ammarneqannginneranni takkupput. Taakku inunnik silami utaqqisunik nakkutiginninnermut ikiuinerminnik tunuartitsiniarlutik Namminersorlutik Oqartussat akiuussusersuinermut ataqatigiissaarisuannut, Anna Wangenheimimut siorasaaruteqarnermikkut akiuussuserneqarput.
Charlotte Ludvigsenip pisoq ajuusaarutigalugulu utoqqatsissutigaa.
AAMMA ATUARUK Charlotte Ludvigsen akiuussuserneqarnissamut qaangeraanini pillugu: Ajuusaarpunga - utoqqatserpunga
KNR-ip inuit Charlotte Ludvigsenip siuleriiaattunik qaangiiginnarsimanera pillugu apeqquteqarfigai:
- Borgmesteri taamatut arlaannik ikiuunnissaminut tunngaveqarluni vaccinerertinniarsarissappat pissusissamisoorsorivara. Kisiat borgmesteriunera kisiat peqqutigalugu vaccinerertinniassappat pissusissamisoorsorinngilara, Jacob Larsen oqarpoq.
Taassuma tunumini siuleriiaattoqangaatsiartoq oqaatigaa.
- Takusinnaavarput maannakkut utaqqisorparujussuit allatulli taava aamma utaqqisinnaasariaqarput. Kinannguugutta kinarsuugaluaruttaluunniit utaqisussaatitaavugut, imaanngilaq borgmesteriuguni taava siullinngortinneqassasoq, Jacob Larsen oqarpoq.
Henriethe Malakiassenip qaangiiginnartoqarsimanera aamma kusanannginnerarpaa:
- Soorunami uggornarpoq innuttaasutut allatut aamma ataqqisussaagaluarpaa innersuussat. Uggornarpoq taamatut borgmesteri imaluunniit atorfilittat allat aamma taamatut pissusilersorsimanerat.
Lars Vinterilli Charlotte Ludvigsenip siuleriiaattunik qaangiiginnarsimanera ajorinngilaa:
- Uanga ajorinngilara. Borgmesteriugami allanit salliutinneqartussassagami. Inuk ataasiinnaq qaangeraasimaguni uanga isinni soqutaanngilaq. .
Inuk ataasiinnaq pineqanngilaq. Atorfilittat pingasut aamma taamaaliorput. Tamanna isummannut allannguiva?
- Inuppassuaqarpoq kapitikkumanngitsunik, kapitikkumasut taamatut atorfimminut atatillugu periarfissaqarunik kapitikkiartorniarlik
Inuit Ataqatigiit siulittaasorisimasaata maanna inuit pisinnaatitaaffii pillugit siunnersuisoqatigiinni siulittaasup tamanna uggornarnerarpaa.
- Taama pisoqarsimanera uggornartorujussuuvoq.
- Tassami mianersortussaapput tamarmik politikeriusut. Aamma uani suliaq tatiginartuunissaa tamanut assigiimmik naligiimmik ammanera eqqarsaatigaglug qulakkiissagaanni politikerit oqartussallu pisortani sulisut atorfilittat tamatmik mianersortumik periuseqartariaqarput
- Tassami takuara oqaaseqarsimasut avammut arlaliusut. Uanilu akiuussusersuiniarnerni nunatsinni unamminartortai qanoq annertutigisimanersut eqqarsaatigalugit.
Taava borgmesteri siuleriiaattunik qaangiiginnarsimassanngikkaluarpa?
- Soorunami oqartussat minnerunngitsumillu politikerit mianersungaatsiartariaqarput, taamaammat ajuusaarnaqaaq taamatut pisoqarsimammat.