Charlotte Ludvigsen akiuussuserneqarnissamut qaangeraanini pillugu: Ajuusaarpunga - utoqqatserpunga
![](/sites/default/files/styles/image_934x467/public/article_images/charlotte_ludvigsen_nationaldag.jpg?itok=or6NQ8jd)
Nuummi atuarfimmi USK-imi sapaatip-akunnerata siuliani akiuussusersuisoqangaatsiarpoq.
Matut suli ammarneqanngitsut siuleriaattorpassuanngoreerput. Kapitikkiartortulli ilaat siuleriiaattuniinngillat.
Kommuneqarfik Sermersuummi borgmesteria, Charlotte Ludvigsen (IA) atorfilittani pingasut peqatigalugit akiuussusersuiffiusumut USK-imut matut ammarneqannginneranni takkupput. Taakku inunnik silami utaqqisunik nakkutiginninnermut ikiuinerminnik tunuartitsiniarlutik Namminersorlutik Oqartussat akiuussusersuinermut ataqatigiissaarisuannut, Anna Wangenheimimut siorasaaruteqarnermikkut akiuussuserneqarput.
Sisamanngormat akiuussusersuineq paatsiveqanngitsoq
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Namminersorlutik Oqartussat utoqqatsertut: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Charlotte Ludvigsenip pisoq ajuusaarutigalugulu utoqqatsissutigaa.
KNR-ip borgmesterimik apersuinera tamaat aana.
Charlotte Ludvigsen, juulip ulluisa 22-anni akiuussusersorneqariartoravit pisoqarnera oqaluttuarisinnaaviuk?
- Ulloq taanna sisamanngornermi akiuussuserneqartussaallunga, sulisut taakungarniartut peqatigalugit taakungarpunga.
- Taava soorunami iluani malinnaavunga namminneq kajumissutsiminnik sulisoqarfimminngaanniit sulisut piareersarneqartut isiginnaarlugit. Taava tassani sulisut peqatigisakka kapitittussaammata peqatigalugit kapitippunga. Tunuleriiaartuni peqataanngikkaluarlunga, kisianni isumaqaraluarama tassani akiuussutissamut illersuutit kapuutigineqartussat naammattut, soorlu siornatigut siuliini kapitittartut ikippallaaqimmata sinneqartarnerat pissutigalugu, eqqarsarsimagaluarpunga akiuussutissat naammattussaasut.
- Kisianni ullup ingerlanerani paasivara naammassimanngitsut inuppassuillu kapitinngitsoorsimasut. Taamaattumik aamma taanna ajuusaarnartorujussuuvoq, uanga siunertarinikuunngikkaluarakku allaniit pitsaanerusumik imminut inissillunga kapitikkiartussallunga, Charlotte Ludvigsen KNR-imut oqarpoq.
Iseriartoravit siuleriiaallutik utaqqisut takuigit?
- Iseriartorninni takuakka siuleriiaattut aaqqissorneqarsimasut, kisianni naatsorsuutigigaluarpara kikkut tamarmik akiuussutissamik kapitinnissaminnut periarfissaqarumaartut.
Sooruna allat utaqqisut qaangiinnarpigit?
- Tassami periarfissaq una takoriarakku sulisut taakungarniartut taakungaqatigivakka, aamma eqqarsanngilanga pitsaanerusumik inissinnarlunga, kisianni aap.
- Tassami ajuusaartorujussuuvunga taamatut iliorsimagama aamma kingumut utertissinnaasuugukku taamaasiussagaluarpunga nalunngitsuugukka akiuussutissat naammassimanngitsut. Kisianni pisoq allanngortissinnaanngilara taannalu innuttaasunut utoqqatsissutigerusuppara ullormi taamatut pisoqarneranut.
Siuleriiaattuneeqqaanngitsoq
Qinikkatut atorfeqarlutit utaqqisut qaangiinnarlugit akiuussuserneqarnerit pissusissamisoorpa?
- Naamik, pissusissamisuunngilaq. Aamma siullermik kapitikkama, allatulli utaqqisuni utaqqeqataanikuuvunga.
- Uaniuna aappassaani ulloq taanna periarfissaqarpiannginnama tunuleriaattunut nikorfanissannut, taamaattumik sulisut taakungalermata kapitittussaallutik aalajangersimavunga taakungaqatiginiarlugit, kisianni eqqarsarsimanngilanga akiuussutissat taakku tunniunneqartussat naammattussaasimanngitsut sunaaffa.
AAMMA ATUARUK Arlaqartut kapitinngitsoorlutik angerlaannartut: Aaqqissuulluagaanngilaq
Ima paasitinneqarpugut illit atorfilittatillu siulliullusi akiuussuserneqanngikkussi kommunip USK-ip silataani ikiuiniarnini unitsissagaa. Imaappoq akiuususerneqanngikkussi massakkut, kommunip ikiuiniarnini unitsissavaa. Taanna nalunngiliuk – eqqorpa?
- Taamatut siorasaarisimaneq taakungarama ilisimasimanngilara, siorasaarisimanerlu uani sapaatit akunnerata aallartinnerani aatsaat paasivara.
- Taamaattumik neriuppunga una paatsuuinermik aallaaveqartoq aamma soorunalimi coronap nalaani, nualluutip tuniluunnerani ikiuinissarput pingaartipparput.
AAMMA ATUARUK Akiuussusersuinermut ataqatigiissaarisoq: Borgmesteri atorfilittallu salliullutik akiuussuserneqarniassagamik sioorasaaripput
Innuttaasunut qanoq oqaasissaqarpit?
- Innuttaasunut oqaatigerusuppara utoqqatserlunga taama iliuuseqarsimagama. Taanna akisussaaffik tiguara aamma imaanngilaq allaniit pitsaanerusumik inissinniarlunga taamaasiorsimagama.
- Nalunngitsuugukku akiuussutissamut kapoorutissat naammanngitsut taamaasiorsimanavianngikkaluarpunga. Ajuusaaqaanga.
Taamatut utoqqatserneq naammappa?
- Tassami piffissaq kingumut utertissinnanngilara, allanngortissinnaanngilara. Kapitereernikuuvunga, pisoq allanngortissinnanngilara.
Kingorna allatut qanoq iliorsimasinnaaninnik eqqarsaatersuuteqarpit?
- Uanga nammineerlunga inuttut eqqarsaatigaara qinikkatut pissaanera soorunami atornerlunnavianngilara, aammalu neriorsuutigissavara pissaanermik atornerluineq uanga atugarisuunnginnakku, neriuppungalu inuit suli tatigisinnaagaannga.
Tatiginassutsippit innarlerneqarsimasinnaanera paasisinnaaviuk?
- Paasisinnaavara, aamma ajuusaartorujussuuvunga utoqqatserlungalu.
Borgmesteriuinnarnissani naatsorsuutigigaa
Borgmesteritut ingerlaqqiinnarnissat naatsorsuutigaajuk?
- Aap, soorunami naatsorsuutigaara, aamma una kukkunera ilinniutigaara sulininnilu aalajangiisarninni imminut iluaquserniarlunga sulinngisaannarama, taamaattumik neriuppunga suli tatigineqarlunga ingerlaqqinnissannut.
Nammineerlutit pisoq pissaanermik atornerluinertut nalilersinnaviuk?
- Taakungarpunga ajunngitsumik eqqarsarlunga, qallunaatut oqartarput, ‘i god tro’. Kapitikkiartortut uku peqatigalugit, imaanngitsoq uanga pissaanermik atornerluiniarlunga taamaasiortunga.
- Kisianni ulloq taanna kapitittussaavunga ukulu piffissap aallartinnerani kapitittussaariarmata peqatigivakka kapitikkiartorlunga, kisianni imaanngitsoq uanga sianigigiga siorasaarisoqarsimasoq imaluunniit uanga imminut allaniit ajunnginnerusumik inissinniarlunga.
Nunatsinni akiuussutissamik kapitissimasut
35.000-it siullermeertumik kapitissimapput. Tassa innuttaasut 62 procentii akiuussuserneqareerput.
40 procentit tamakkiisumik akiuussuserneqarsimapput.
38 procentit suli akiuussuserneqanngillat.
Akiuussutissaq Modernameersoq atorneqarneruvoq.
Akiuussutissap aappaa siullermik kapitinnermit ullut 28-t 43-llu ingerlaneranni pissarsiarineqassaaq.
- Kisianni soorunami ajuusaarpunga, akiuussutissat naammannginnerat eqqarsaatigalugu, inuppassuit asulersuaq silami siuleriiaarlutik nikorfasimammata.
- Taanna sianigisimasuugukku soorunami allatulli utaqqisimassagaluarpunga.
- Siornatigut akiuussutissat tunniunniarneqartut sinneqartarsimammata annerusumik eqqarsarsimanngilanga taama kinguneqarsinnaaneranik.
Isilerassi siuleriaattut takunikuullugit eqqarsariaallanngilatit ‘immaqa allatulli utaqqiguma’? Allakkut iserlutit, matut suli ammanngitsut akiuussuserneqarlutit – aamma tassani eqqarsarianngilatit allatulli utaqqisinnaallutit?
- Oqareernittuut tassani pingaarutilinnik allanik suliassaqarlunga periarfissaq atorluaannarsimavara ulloq taanna piffissaqarnaviannginnama.
- Kisianni nalunngitsuugukku naammanngitsut soorunami kingullermitut inississimassagaluarpunga. Nalunngitsuugukku sapaammi aaqqissuussamut utaqqisimasinnaagaluarpunga, kisianni taassuma kingorna aatsaat paasivarput naammanngitsut, Charlotte Ludvigsen oqarpoq.