Arlaqartut kapitinngitsoorlutik angerlaannartut: Aaqqissuulluagaanngilaq

Atuarfimmi USK-imi kikkut tamarmik akiuussuserneqarnissaanut ippassaq sisamanngornermi nalunaaqutaq 14.00-miit 17.00-mut neqeroorutaavoq. 

Sulili nalunaaqutaq tallimanngungitsoq akiuussusersuinermut ataqatigiisaarisut kapitikkiartunut angerlartitsisariaqarsimapput. Akiuussutissami nungussimapput. 

Akiuussusersuinissamut matut suli ammarneqaqqianngitsut soqutiginnittorpassuit takkupput. Tamaanimi inuppassuit kapitikkiartorlutik tunuleriiaatilereerput. 

Ullullu ingerlanerani tunuleriiaattut amerliartorput. Allaat Hotel Hans Egede tikillugu tunuleriiaattoqarluni. Inuilli akunnerpassuarni tunuleriiaatereerlutik nalunaarfigineqarput akiuussutissat nungussimasut. 

KNR kapitikkiartoraluartunit attavigineqarpoq, taakkualu akiuussusersuinissamut aaqqissuussineq iluarinngilaat.

Dorit Olsen taakkununnga ilaavoq, taannalu akunnerit pingasungajaat utaqqigaluarpoq, inuillu tunuleriiaattut imminnut qanippallaarsoralugit.

- Akunnerit marluk minutsillu 52-eqqissaat nikorfavugut. Taava angut illup qalianut qaqeriarluni immitsinnut ungasinnerunissatsinnik torlulaartaammik suaartarpoq. Qisuariartoqanngilaq.

- Taava minutsit marluk ingerlammata, normumik tunineqarsimanngitsut tamarmik ulloq taanna kapitissinnaanngitsut oqarpoq, taannalu suli qaanginngilara. Taama oqarnermini qungujulavoq. Qinngarnartorujussuuvoq. Ukiuni 63-ini inuuvunga aatsaallu taama misigisaqarlunga, Dorit Olsen oqarpoq. 

Pakatsinarpoq aqqissuulluagaananilu

Aamma Klaus Frederiksen kapitinngitsoorpoq. Taanna Naajaani aatsitassarsiornermut suliniummik suliaqarpoq. Sumiiffimmilu avinngarusimasumi sulisarami akiuussuserneqarnissaminut periarfissaqarujussuarnani oqarpoq.

Siullermilli juunip ulluisa aappaanni kapiteqqaarpoq.

Aappassaaniilli kapineqarnissaminut ilungersorarluarluni suli iluatsinngilaa, qaammallu ataaseq affarlu ingerlareersut aappassaanik kapineqarnissaata sivisuallaarnissaa ernummatigaa.

Taamaammat Nuummut ippassaq nalunaaqutaq marluk missaanni tikikkami tunuleriiaattunut ilanngukkiartupallappoq, kapitittoqarunnaartorli akunnerup aappaa avillugu utaqqereerluni paasitinneqarluni.

- Assut pakatsinarpoq, aaqqissuussineq taama ingerlasimassappat, aammalu aaqqissuulluagaasimagunanngimmat, Klaus Frederiksen oqarpoq.

Taanna Nuummit aallaqqittussaavoq, tamakkiisumillu akiuussuserneqarnissaminut qaqugu periarfissaqaqqissalluni nalullugu oqarluni.

Namminersorlutik Oqartussat utoqqatserput

Namminersorlutik Oqartussat ippassaq pisut pillugit tusagassiuutinut ima nalunaaruteqarput.

- Inuit taama amerlatigisut suli kapineqanngitsut tiimini arlalinni sialussioreersullu angerlartinnerini kukkussuteqarluta nassuerutigisariaqarparput, tusagassiortunut nalunaarummi allaqqavoq.

Kapitinngitsoortut Nuummi ulloq alla kapitikkiartornissaat Namminersorlutik Oqartussat kaammattuutigaat.

Akiuussusersuinissamut piffissap sivitsornissaa ullullu amerlinissaat sulissutigalugu Namminersorlutik Oqartussat allapput.