Nuummi akiuusserneqarniarluni qaangiisoqareersorlu: Charlotte Ludvigsen borgmesteritut atuuffimminiiginnassaaq
![Borgmester Charlotte Ludvigsen (IA). Foto: KNR Borgmester Charlotte Ludvigsen (IA). Foto: KNR](/sites/default/files/styles/image_934x467/public/article_images/charlotteludvigsen2.jpg?itok=u_A_POF7)
![Borgmester Charlotte Ludvigsen (IA). Foto: KNR Borgmester Charlotte Ludvigsen (IA). Foto: KNR](/sites/default/files/styles/image_934x467/public/article_images/charlotteludvigsen1.jpg?itok=T22mkE5Y)
Kommuneqarfik Sermersuumi borgmesteri Inuit Ataqatigiinneersoq, Charlotte Ludvigsen, atuuffimminiiginnassaaq.
Kommuneqarfik Sermersuumi attaveqaqatigiinnermi immikkoortoqarfia KNR-imut taama uppernarsaavoq.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Eqqartuussissuserisut misissuinerat Kommuneqarfik Sermersuumi kommunalbestyrelsimi ilaasortat ippassaq unnukkut matoqqasumik oqallisigaat.
Oqaluuserisassat matoqqasut tusagassiuutinit kommunalbestyrelsimullu ilaasortaanngitsunit malinnaavigineqarsinnaanngillat.
AAMMA ATUARUK Inuit Charlotte Ludvigsenip qaangeraanera pillugu: Pissusissamisuunngilaq
Taamaammat ataatsimiinnermi qanoq oqaaseqartoqarsimanera KNR-ip aamma ilisimanngilaa. Charlotte Ludvigsenili borgmesteritut atuuffimminiiginnassasoq oqaatigineqarpoq. Kommunalbestyrelsillu suliamut atatillugu ataatsimoorlutik ullumi kingusinnerusukkut nalunaaruteqarumaarpoq.
Oqaaseqarnianngitsut
Tassunga tunngatillugu Siumut gruppiata siulittaasua, Martha Abelsen Demokraatillu gruppianni siulittaasoq, Justus Hansen KNR-ip oqaaseqartinniarlugit oqaloqatigigaluarpai, taakku tusagassiuutinut nalunaarutip saqqummiunneqarnissaanut utaqqinissamik innersuussipput, oqaaseqarusunnatillu.
Charlotte Ludvigsen aamma apersorniarsaraarput.
Suliaq saqqummeqqaarmat Justus ansen KNR-imut ima oqarpoq:
- Borgmesterip naliliisinnaassusaa ajorpoq, takusinnaanngilaaluunniit uffa tunuleriiaattorpassuaqartoq. Nammineq tamakku qaangiinnarlugit matukkut allakkut iserlunilu anisimavoq, Naalakkersuisut politikerillu allat allatulli utaqqeqataasut. Tunuleriaattullu tamakkua akornanniittut takusinnaavagut. Taamaattoqartussaanngilaq, Justus Hansen oqarpoq.
AAMMA ATUARUK Akiuussusersuinermut ataqatigiissaarisoq: Borgmesteri atorfilittallu salliullutik akiuussuserneqarniassagamik sioorasaaripput
Aamma Kirsten Fenckerip peqqissutsimut naalakkersuisuusup (Naleraq) suliaq aamma akuerineqarsinnaannginnerarpaa.
- Akiuussutissalersuinermi inuiaqatigiinni sanngiinnerusut salliutinneqartussaapput, taamaammallu erseqqissaassutigineqassaaq, allatut pissusilersorsimaneq akuersaarneqarsinnaanngimmat, Kirsten L. Fencker oqarpoq.
Siumumit Inga Dora G. Markussenip Sermersuumi kommunalbestyrelsineersup ima oqaatigaa:
- Akiuussusertinniarluni ikusikkaatut pissusilersortoqarpoq, tamannalu pissusissamisuunngilaq, immikkut ittumik imminnut pitipput, taamatullu pisoqaqqissanngilaq, tamattami naligiittussaavugut.
Siorasaarneqartutut uukapaatinneqartutullu misigisimasoq
Suliaq Charlotte Ludvigsenip atorfilittani pingasut peqatigalugit Nuummi akiuussutissamik kapitinniarlutik siuleriiaattunik juulip ulluisa 22-anni qaangiineranni aallartippoq.
Tamanna Demokraatinit, Anna Wangenheimip KNR-imut oqaatigaa. Taanna atuarfiup USK-ip silataani inuit sialummi siuleriiaannerata nalaani akiuussusersuinermut ataqatigiissaarisuuvoq.
AAMMA ATUARUK Charlotte Ludvigsen akiuussuserneqarnissamut qaangeraanini pillugu: Ajuusaarpunga - utoqqatserpunga
Anna Wangenheimip oqarnera naapertorlugu nammineq siorasaarneqartutut borgmesterimullu iluaqutaanerusoqarnissaanut uukapaatinneqartutut misigisimavoq.
Tamanna atorfilittat ilaata kapitinngikkunik akiuussutissamik kapuisoqarnissaanut ikiunissamik neriorsuuteqarnertik unitsinniarlugu oqaatigisimavaa.
Ajuusaarlunilu utoqqatsertoq
Kommunilli Anna Wangenheimip siorasaarineraanera ilisarisinnaanngilaa. Tamanna kommunip suliffeqarfimmi kiffartuussiffiani pisortaagallartup, Gerth Jacobsenip nassuiaatigaa. Atorfilittallu akiuussusersuinermi siuleriiaattunik nakkutilliinermut ikiuutissagunik kapitikkusullutik taamaallaat oqarsimanerarlugit.
Borgmesteri siuleriiaattunik nammineerluni ikiuuttussaanngilaq. Taamaakkaluartorli siuleriaattunik qaangiiginnarluni atorfilittat pingasut akiuussutissamik kapiteqatigai.
Charlotte Ludvigsen pisoq pillugu juulip ulluisa 29-anni ajuusaarlunilu utoqqatserpoq.
Borgmesteri atorfilittanilu siuleriiaattunik qaangiiginnarnera pissaanermik atornerluinertut taanneqarsinnaasoq, Aalborg Universitetimi inatsisilerinermik ilinniarfimmi professori Sten Bønsing Sermitsiaq.ag-mut naliliivoq.