Demokraatit Charlotte Ludvigsen pillugu: Pissaanermik atornerluinerup killinganiippoq
![](/sites/default/files/styles/image_934x467/public/article_images/dsc01648_0.jpg?itok=hdXHJMOb)
Charlotte Ludvigsenip akiuussusertinniarlutik tunuleriaattorpassuit qaangiinnarlugit akiuussusertissimanera pillugu Siumut siulliulluni isornartorsiuivoq. Maannalu aamma Kommuneqarfik Sermersuumi borgmesterimut tapersersuisut, Demoktaatit isornartorsiuipput. Demokraatit gruppemi siulittaasuat aammalu kommunemi borgmesterip tullersortaa siulleq, Justus Hansen, isornartorsiuivoq, taanna naliliivoq borgmesterip taama iliornera akuerineqarsinnaanngitsoq:
- Borgmesterip naliliisinnaassusaa ajorpoq, takusinnaanngilaaluunniit uffa tunuleriiaattorpassuaqartoq. Nammineq tamakku qaangiinnarlugit matukkut allakkut iserlunilu anisimavoq, Naalakkersuisut politikerillu allat allatulli utaqqeqataasut. Tunuleriaattullu tamakkua akornanniittut takusinnaavagut. Taamaattoqartussaanngilaq, Justus Hansen oqarpoq.
Naleqqameersoq Emanuel Nuko aamma taama isumaqarpoq, taanna Kommuneqarfik Sermersuumi borgmesterimut tullersortip aappaatut inissisimavoq:
- Taamaattoqaqqissanngilaq. Tamatta naligiittussaavugut, qinigaagutta qinigaanngikkuttaluunniit, taamaattumik tamanna akuersaarneqarsinnaanngilaq, siunissamilu taama pisoqaqqinnissaa kissaatiginanngilaq, taanna oqarpoq.
Pisoq pillugu misissuisoqartariaqartoq
Demokraatit Charlotte Ludvigsen ualimut ataatsimeeqatigissavaat, pisorlu pillugu nassuiaanera tusarnaarlugu. Qanorluunniillu inerneqaraluarpat, Demokraatit piumasariniarpaat, pisoq pillugu arlaannaanulluunniit attuumassuteqanngitsumik misissuisoqassasoq:
- Qanorpiaq pisoqarsimanera pillugu qulaarerusuppugut, kikkullu aamma matumani peqataasimanersut paaserusuppagut. Peqqinnissaqarfimmi sulisuniit siorasaarisoqarsimaneranut tunngasumik tusagaqarnerput annilaarutigaarput, taamaattumik iternga tikillugu misissuisitserusuppugut, Justus Hansen oqarpoq.
Matumani Demokraatit Siumukkutulli iliorput, taakkumi aamma isumaqarput pisoq misissorneqartariaqartoq. Demokraatit Siumukkullu Charlotte Ludvigsenip tunuleriaattorpassuarnik qaangiinera pillugu qanoq kinguneqartinneqarnissaa pillugu misissuisoqareernerata kingorna aatsaat paasissavaat.
Borgmesteri pisoq pillugu utoqqatserpoq
Charlotte Ludvigsenip siorasaarisoqarsimaneraanera akuersaanngilaa - taannami oqarpoq "paatsuuisoqarsimasoq". Nassuerporli utaqqisorpassuit qaangiinnarsimagini, borgmesterilu KNR-imut sisamanngormat ima oqarpoq:
- Taamak pissusilersorsimanera ajuusaarutigeqaara, nalunngitsuugukku akiuussutissamik kapuutit nungussimasut taamaaliorsimanavianngikkaluarpunga. Pisorli utertissinnaanngilara, ajuusaarpunga innuttaasunut ulloq taanna taama pisimagama, oqarpoq.
Akiuussusersuinermut ataqatigiissaarisup Anna Wangenheimip pisoq Peqqissutsimut naalakkersuisoqarfimmut nalunaarutigaa, aammalu atorfimminit soraarniuteqarpoq taamaalilluni suliunnaarnissaminit qaammat ataaseq sioqqullugu soraarpoq.