Eqqartuussissuserisup akiuussutissalersuineq pillugu misissuinermini kommuni isornartorsioraa
Borgmesterip, Charlotte Ludvigsenip atorfilittani pingasut peqatigalugit inuit akiuussutissamik kapitinnissamut siuleriiaattut qaangiinnarlugit akiuussuserneqarnera ingerlatsinermi ileqqorissaarnerunngilaq.
Tassa imaappoq kommuni innuttaasunut atatillugu ileqqulersuutissamisut iliorsimanngilaq.
Tamanna eqqartuussissuserisut Nuna Advokatit Kommuneqarfik Sermersuumut misissuineranni inerniliunneqarpoq.
AAMMA ATUARUK Nuummi akiuusserneqarniarluni qaangiisoqareersorlu: Charlotte Ludvigsen borgmesteritut atuuffimminiiginnassaaq
KNR-ip nalunaarusiaq takunnissinnaatitaaffigaa.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Tassani ima inerniliisoqarpoq: ”kommuni juulip ulluisa 22-anni akiuussusersuisoqarneranut atatillugu ingerlatsinermi ileqqorissaarnissaq illukartippaa, tassanilu ileqqussaanngitsumik pissaanermik allannguinissamut inerteqquteqarnermut naapertuutinngitsumik nammineq soqutigisat attuumassuteqanngitsut ilanngutitillugit, taamaalillutik atuuffimminni pissaanertik imminnut iluaqutaasussanngorlugu ingerlatsinermi ileqqorissaanissaq illuartillugu”.
Allatut oqaatigalugu eqqartuussissuserisut misissuinerata kommuni isornartorsiorpaa.
Aamma atorfillit erngertumik akiuussuserneqanngikkunik silataani siuleriaattunik ataqatigiissaariumannginnerisa ileqqussaanngitsoq inerniliunneqarpoq.
Siuleriiaattut qaangiinnarai
Suliaq Charlotte Ludvigsenip atorfilittani pingasut peqatigalugit Nuummi akiuussutissamik kapitinniarlutik siuleriiaattunik juulip ulluisa 22-anni qaangiineranni aallartippoq.
Tamanna Demokraatinit, Anna Wangenheimip KNR-imut oqaatigaa. Taanna atuarfiup USK-ip silataani inuit sialummi siuleriiaannerata nalaani akiuussusersuinermut ataqatigiissaarisuuvoq.
Taanna Demokraatinit peqqissutsimut naalakkersuisuusimavoq.
Anna Wangenheimip oqarnera naapertorlugu nammineq siorasaarneqartutut borgmesterimullu iluaqutaanerusoqarnissaanut uukapaatinneqartutut misigisimavoq.
Tamanna atorfilittat ilaata kapitinngikkunik akiuussutissamik kapuisoqarnissaanut ikiunissamik neriorsuuteqarnertik unitsinniarlugu oqaatigisimavaa.
Kommunip siorasaarisoqannginneraraa
Kommunilli atorfilittanit siorasaarisoqarsimannginnerarpaa. Kommunip suliffeqarfimmi kiffartuussinermi pisortaata, Gerth Jacobsenip atorfilittat illersorlugit akiuussusersorneqartut siuleriiaarnerannik ikiuinissamut akiuussuserneqarusunnerat pissusissamisoornerarpaa.
Borgmesteri siuleriiaattunik nammineerluni ikiuuttussaanngilaq. Taamaakkaluartorli siuleriaattunik qaangiiginnarluni atorfilittat pingasut akiuussutissamik kapiteqatigai.
AAMMA ATUARUK Inuit Charlotte Ludvigsenip qaangeraanera pillugu: Pissusissamisuunngilaq
Atorfilittallu siuleriiaattorpassuarni ataqatigiissaarilinnginnerminni kapiteqqaarumanerat siorasaarinerusoq, eqqartuussissuserisut nalunaarusiaanni allassimavoq.
- Pissutsit sulisup ikiuunnissaminut akiuussutisserneqaqqaarusunnerani aallartittut ileqqussaanngitsumik kommunip akiuussusersuisoqarnerani siuleriiaattunik nakkutiginninnermut suleqatiginninnerminik tunuartitsinissaanik siorasaaruteqarneratut inernilerneqassaaq, inerniliinermi allassimavoq.
Charlotte Ludvigsenip pisoq KNR-imit allaaserneqarnerani arlaleriarluni utoqqatsissutigalugulu ajuusaarutiginikuuaa.
Taassumalu atorfilittat akiuussuserneqarnissaminut siorasaarisimanerat ilisimasaqarfiginnginnerarpaa. Paasisimasaqanngiivissinnaanngitsorli nalunaarummi inerniliutigineqarpoq:
- ... Tamarmik akiuussuserneqarnerminni innuttaasunik silataani siuleriiaattoqartoq paasisimalluinnassavaat, taamaalillutillu atuuffimmik iluaquteqarlutik kapitillutik, misissuinermi nalunaarusiami allassimavoq.
Eqqartuussissuserisut misissuinerat kommunalbestyrelsimit ippassaq unnukkut oqallisigineqarpoq.
Oqallisigineqarnerani matoqqasumik ingerlanneqarpoq, taamaasilluni tusagassiuutit kommunimiluuniit politikeriunngitsut tassunga malinnaasinnaatitaanatik.
Ataatsimiinnerli Charlotte Ludvigsenip borgmesteritut atuuffimmiiginnarnissaanik inerneqarpoq.