Bilitsit akikillinissaat ilimanavinngitsoq
Kalaallit Nunaanniit Kalaallit Nunaannullu silaannakkut angallassinermi akit minnerulernissaat, Nuummi mittarfittaartoqarneratigut, Air Greenlandip unammillerneqarnerulernissaa ilimanarmat, kissaatigineqarsimaqaaq.
Tamannali ilimagineqarpallaassanngitsoq, Danmarkimi silaannakkut angallassinermut tunngasunik nutaarsiassaqartitsivimmi Check-in-imi aaqqissuisoq Ole Kirchert Christensen, naliliivoq.
- Air Greenland unammillerteqassanersoq apeqqutaalluinnassaaq. Taama pisoqassappat aasaanerani akinik appaasoqarsinnaassaaq. Kisianni Air Greenlanditulli ukioq naallugu Kalaallit Nunaannukartartussaqarsorinngilara, oqarpoq.
Inummut angalaniartumut akigititaasartut taamaattumik appangaatsiarnavianngissorai.
- Imaassinnaavoq, unammillerteqalissappat akit 1.000 koruunimik appartut, kisianni piffissami siullermi aappaangaatsiarnissaq ilimagineqassanngilaq, oqarpoq.
Aasaanerani angallanneq unammillerfiulissappat, tassa ajortussartaa, erseqqissaavoq. Air Greenlandimi appaasariaqalissaguni ukiup sinnerani annaasani isertinniarsarisussaassavai.
Kalaallit Nunaata aamma tikeraaqarnerulernissamut qanoq piareersimatiginera apeqquserpaa.
- Kalaallit Nunaanni unnuisarfinnik amigaateqarneq, tikeraat amerleriarpiloornissaraluannut aamma killiliissaqaaq. Unnuisarfiit naammattut aatsaat pigineqalerpata, tikeraat amerleriarsinnaalissapput, Ole Kirchert Christensen oqarpoq.
Savalimmiuni aamma
Kalaallit Nunaata pissutsit atugarilerumaagai, Savalimmiuni ukiut qulit matuma siornagut atukkanut assersuunneqarsinnaapput. Taamani Atlantic Airwaysip saniatigut angalatitseqatigiiffiit allat Savalimmiunut Savalimmiuniillu angallassisalerput, Ole Kirchert Christensen oqaluttuarpoq.
- Atlantic Airwaysip taamani paasivaa, SAS-ip aasaanerani angallanneq iluanaarutiginerpaasaraa, namminnerlu ukiup sinnerani angallassineq tamaat isumagisariaqalertarlugu. Soorlu Air Greenland aamma taama piumaartoq, eqqoriaavoq.
- Taamaammat paasinaqaaq Air Greenlandip akiligititai allanit qaffasinnerusussappata, taakkuuppummi angallat angallassiunnaaraangata nunaminni angallassisartut, oqarpoq.
Silap qanoq ittuunera aamma apeqqutaalluinnartarpoq. Akigititatigummi qulakkeerniarneqartarpoq, taamaatiinnartoqarpat kinguaattoortoqarpalluunniit angalasup unnuiffissaqartinnissaa – angalatitsivimmit akisussaaffigineqarmat.
Kisianni aamma Kalaallit Nunaanni unnusarfinnik naammattunik peqarnersoq apeqqutaalluinnassaaq.
- Silap pissusaa pissutigalugu, ukioq kaajallallugu timmisartuussisinnaaneq ajornassaaq, taamaammat taamaatitsisoqarpat hotelitut ittunik atorfissaqartitsisoqalertarpoq, tamannalu angalatitseqatigiiffiit Nuummiit Nuummullu timmisartuussisut arlariippata unammillernartorujussuussaaq, oqarpoq.
Oorit inuiaqatigiinnut utissasut
Ole Kirchert Christensenip nppaasisinnaalluarpaa Nunatsinni akit apparnissaannik kissaateqarnerput, pingaartumik qeqertanut allanut angallassinerit akikinnerusinnaasarnerat eqqarsaatigigaanni.
Peqatigitilluguli eqqarsaatigisariaqarsoraa Air Greenlandip Namminersorlutik Oqartussanit pigineqarneratigut oorit tassunga atukkat inuiaqatigiinni kaaviaartinneqartunut ilaalersarnerat, ineriartornermut aningaasaliinernullu iluaqutaallutik.
- Ilaquttalli pillugit angalanerussagaangata akit qaffasinnerisa aporfiusinnaasarnerat soorunami paasisinnaaqaa, kisianni unnuisarfiit naammattut pigilertinnagit akit appartinneqarsinnaanavianngillat, oqarpoq.