Alaska Qimmit qimuttut nukkassaatitortinneqarsimasut
Qimmimmi qimuttoqatigiit ilaat ukioq manna marsimi sukkaniuttoqarnerani nukkassaatitortinneqarsimasut paasineqarpoq.
Nipaallisaat Tramadol, unammersuarnernut atatillugu inerteqqutaasoq qimminut tunniunneqarsimavoq, qimmimmi sukkaniunnermi Iditarodimi 1600 kilometeringajannik ingerlaareerlutillu apuummata misissorneqarput, Tramadolimillu tunineqarsimasut paasineqarluni.
Qimmit qimuttoqatigiit ilaat sukkaniuttoqarnissaanut atatillugu misissorneqartarput, kingornalu aamma misissuisoqartarluni.
Sukkaniunnermi peqataasut sukkaniunnissap aallartinnissaata tungaanut ingerlaarfissami sumiiffinni assigiinngitsuni nerukkaatissanut toqqorsiviliortarput.
Nerukkaatissat toqqorsiviit ilaanni nipaallisaammik Tramadolimik pilersorneqarsimagunartut, sukkaniunnermi peqataasut ilaat oqarput.
Qimmit qimusserluni sukkaniunnermi Iditarodimi peqataasut nukkassaatitortinneqarsimanersut 1994-imi misissorneqartalerput, qimuttoqatigiillu nukkassaatitortinneqarsimasut aatsaat paasineqarpoq.
