BankNordikip sinneqartooruteqarnini attatiinnarpaa
Ilutigitillugu aningaaseriviup Danmarkimi allilernini suli ingerlattuarsinnarpaa, Amagerbankip, ukioq kingulleq akiliisinnaajunnaartup, "pitsaasortaanik" taaneqartartunik tigusinermigut.
- Danmarkimi sullitassavut nutaat 90.000-it tikilluaqqusinnaagatsigik nuannaarutigisorujussuuvarput, aningaaserivimmi pisortaanerup, Janus Petersenip, ukiup affaanut naatsorsuutit pillugit oqaaseqarnermini oqaatigaa, BankNordikilu aningaaseriviusoq nukittooq, akiliisinnaassuseqarluartuusorlu erseqqissarlugu.
Aningaaserivimmut aningaasaliissutit attartortinneqartartut 1,3 milliardit koruuninik qaangersimavaat, taamaattumillu aningaaseriviup aningaasat tigoriaannaatai ajunngilluinnarput naak aningaasanik niuffaffiit nalorninartumik inissisimagaluartut.
Ukiumut angusassatut naatsorsuutigisat 100-140 millionit koruuninissangatinneqarneraat aningaaseriviup attatiinnarsinnaassavaa, kisiannili Amagerbankimik tigusinermut atatillugu ukioq kingullermut naatsorsuutit 30 millionit koruuninik sunnerneqarnissat ilimagineqarluni.
BankNordik Savalimmiuni ukiut 100-t matuma siorna pilersinneqarpoq, ullumikkullu Danmarkimi, Kalaallit Nunaanni Savalimmiunilu immikkoortortaqarluni. Aningaasat kaaviaartinneqartut 20 milliardit koruuniupput, 630-nillu sulisoqarluni.
