Qulaarpaa Avinneq aaqqissuusseqqinnermut akornutaassaaq
Martha Labansen, aaqqissuusseqqinnissamut ataatsimiititaliami siulittaasuusimasoq, taama oqarpoq.
Alloriarnerit siulliit taamaallaat tiguneqarnikuupput, tassa kommunit kattussuunneqarnissaat:
- Kommunit kattussuunneqarnissaannut siunertarineqartut taava puigorpaat, Martha Labansen oqarpoq.
Kommunit annerit, amerlanerusunik innuttaassusillit pilersinneqarnissaat siunertaasoq, Martha Labansenip oqaatigaa:
- Innuttaasummi amerlanerulerpata, suliassat naammanneqarsinnaanissaannut periarfissat pitsaanerulissapput, innuttaasut sullinneqarnerannut tunngasut ukkatarineqalersinnaallutik, Martha Labansen oqarpoq.
Qaasuitsulli Kommunia avinneqassappat, kommunit ilaanni innuttaasut 8000-it taava ataatissavaat. Kommunimmi suliassanik tunineqarnissaannut innuttaasut amerlassusiisa minnerpaaffilerneqarnerat ataallugit taava innuttaqalissaaq.
Kommunillu naligiinnerulernissaat kommunit aaqqissuuteqqinneqarnissaanni siunertaammat, kommuni "sanngiitsoq" kommunit aaqqissuuteqqinneqarnissaannut kinguarsaataasinnaavoq.
Aamma atuaruk Qulaarpaa Inuit ataasiakkaat sunniuteqarsinnaanerat kommunerujussuit nukittorsarpaat
Kommunip minnersaata aqutsinikkut kivissinnaasai aallaavigalugit aqutsisoqassaaq, kommunip suliassai taama agguaanneqartassallutik. Klaus Georg Hansen, nuna tamakkerlugu pilersaarusiamut suleqataasoq taama oqarpoq:
- Taamaappat suliassat ilaat kommuninut tunniunneqareersut utertinneqartariaqassapput, kommunimmi minnerpaap kivissinnaasai maannamit annikinnerulissapput, Klaus Georg Hansen, nuna tamakkerlugu pilersaarusiamut suleqataasoq oqarpoq.
Aamma atuaruk Qulaarpaa Qaasuitsumi siuariartortoqarpoq
Kommunillu ataasiakkaat, assersuutigalugu Qaasuitsup Kommuniata avinneqarneratigut, suliassanik kivitsisinnaanngitsutut Namminersorlutik Oqartussanit nalilerneqartarnerat nukittorsarneqaannassasoq, Martha Labansenip ernummatigaa:
- Kommunit ataasiakkaat mikivallaalersimanerannik sanngiippallaalersimanerannillu politikerit oqaqqittalernissaat ernummatigaara, Martha Labansen, aaqqissuusseqqinnermut ataatsimiititaliami siulittaasuusimasoq oqarpoq.
Qulaarpaa sisamanngornermi unnukkut nalunaaqutaq arfineq-pingasunut aallakaatinneqassaaq
Aamma atuaruk Qulaarpaa Kommunip avinneqarnissaanut eqqarsarluartoqaqqaassasoq
Aamma atuaruk Qulaarpaa Politikerit nuanninngitsunik aalajangiinissartik pikkoriffigineruleraat
Aamma atuaruk Qulaarpaa Avinnerup iluaqutaanissaa qularnartoq
Aamma atuaruk Suleqatigiiffik: Qaasuitsup Kommunia matoqqavallaarpoq!
