Qulaarpaa Politikerit nuanninngitsunik aalajangiinissartik pikkoriffigineruleraat
Kommunit anginerusut politikerit sakkortuunik aalajangiinissaannut pikkorinnerulersitsisarput, aammali sullissinermut akornutaasarput, ilisimatooq taama isumaqarpoq
- Arlaatigut paasiuminartupilussuuvoq, kommunit pillugit ilisimatooq Roger Buch taama oqarpoq.
Taanna nassuiaavoq innuttaasunut nuanninngitsumik pisoqartillugu, soorlu atuarfimmik matusisoqartillugu sullissinikkulluunniit annikillisaasoqartillugu, taava tamanna innuttaasut ilaannit kamaatigineqartuaannarpoq. Kommunilli anginerulersikkaanni, taava innuttaasut eqqugaasut politikerinit isiginiarneqarpallaarunnaartarput.
Ajunngitsortaqarluni ajortortaqartoq
Ima paasillugu, nuanninngitsunik aalajangiinissaq pisortallu sullissinerannik annikillisaanissaq politikerinut ajornannginnerulersarpoq.
- Politikerit innuttaasut nuannarinngisaannik iliornerat, soorlu sullissinermik annikillisaanerat, atuarfinnik allanillu matooraanerat akornutitut isigineqarsinnaavoq. Tamakkuli aningaasatigut pitsaanngitsumik inissisimaffimmi pisariaqarsinnaapput.
Kommunit pillugit ilisimatuup eqqaavaa Danmarkimi kommuninik aaqqissuusseqqinneq 2007-imi ingerlanneqartoq, ukiullu tulliani aningaasarsiornikkut ilungersunartorsiorneq pilertoq.
Aamma atuaruk Qaasuitsup akiligassaq akilissavaa
Aamma atuaruk Avinnerup iluaqutaanissaa qularnartoq
Taamaammat politikerit taamaattoqarneratigut iluatsitsipput, taamaalillutimmi nuannarineqanngitsunik aalajangiinissaminnut innuttaasut ungasinnerullugit inissisimaleramik, Buch taama nassuiaavoq.
- Tamannali soorunami aningaasarsiornermut tunngatillugu aamma politikerip tungaanit isiginninneruvoq, innuttaasummi aperigaanni allarluinnarmik isumaqartarput. Politikerimmi nuanninngitsunik aalajangiinissaminnut pikkorinnerulersimanerat ajorluinnartutut isigaat.
Aalajangiinerit pisariaqarluinnaraluartut aamma aalajangiinerupput innuttaasunit malugineqarsinnaasut.
- Atuarfinnik matooraaneq, paaqqinnittarfinnik matooraaneq, inoqarfeeqqallu ilarpassuini sullissinerup nalinginnaasumik ajorseriarnera, tamakkuupput Kalaallit Nunaanni inoqarfeerarpassuarni atugaasutut tusartakkakka.
