Avatangiisit pillugit inatsit nutaaq isumalluarfigaat

apriilip 22-at 2005 13:39

Nunatsinni sullivinni avatangiisit pillugit inatsit 1986-imeersoq nutartigaq ukiortaamillu atuutilissassaq Folketingimi akuersissutigineqaqqammerpoq. Inatsimmi nutaami ilaatigut nunami aallaaniarneq piniarnerlu pineqarput, aamma meeqqat qulinik ukioqalereersimasut sulisorineqarsinnaanerat ukiortaamit allanngortinneqartussaq, tassalu 13-ileereersimasut kisimik sulisorineqarsinnaalernerannut tunngasoq ilanngunneqarsimapput.

- Ilassilluaqaarput, inatsisiliorneq ukiorpaaluit ingerlaneranni unittarlunilu aallarteqqinneqartarmat maanna naammassimmat qujanaqaaq. Kalaallit Nunaanni Suliffigissaasut siulittaasuat Ulla Lynge taama naliliivoq.

Maanna suliassaq tullinnguuttoq tassaavoq, Danmarkimi suliffissaqartitsinermut ministereqarfiup nunatsinnut atuuttussanik arlalinnik nalunaarusiortitsillunilu ilitsersuusiortitsinissaa, inatsillu allanngortinnera pillugu suliffeqarfinnut paasisitsiniaasoqassaaq.

Allannguutissat ilaat, tassalu suliffeqarfinni qulinik sinnerlugilluunnit sulisulinni ukioq 2008-mit nalilersuisarnerit atuutilernissaat. Tamannalu Suliffigissaasut tungaannit aamma ilassilluarneqartoq, siulittaasuat oqarpoq:

- Suleqatigiit ataatsimoorlutik suliffigissaanissamut piumaffigineqalernissaat taamaalilluni erseqqinnerulissaaq. Aamma naalagaaffiup nakkutilliinera eqqarsaatigalugu nakkutilliinissamut malitassat taamaalillutik erseqqissarneqarput. Ulla Lynge tunngavilersuivoq.

Ulla Lynge aamma isumaqarpoq, inatsisip nutarterneqarneratigut ullutsinnullu naleqqussarneqarneratigut suliffinni avatangiisit sammineqarnerulissasut.

Danmarkimi suliffissaqartitsinermut ministeri Claus Hjort Frederiksen aamma naliliivoq, inatsisip nutarterneqarneratigut sulinermi pitsaasunik avatangiiseqarnissaq qulakkeerneqassasoq.