SIK: Avataaniit sulisussanik tikisitsineq ajornaatsuusariaqanngilaq
Avataaniit sulisussanik tikisitsineq ajornaatsuusariaqanngilaq. Taama isumaqarpoq SIK-mi siulittaasoq Jess G. Berthelsen
- Uanga isumanni avataaniit sulisussanik tikisitsiniarneq ajornaatsuusariaqanngilaq, Jess G. Berthelsen oqarpoq.
Danmarkimi nunanut allamiunut taakkulu ilanngutsinnissaannut Ministeri Mathias Tesfaye fast-track aaqqiissut atorlugu Europamit Nunallu Avannarliit avataaniit sulisunik tikisitsisarnerup allaffissornikkut ajornaallisarnissaa ilaatigut pillugu Naalakkersuisup Erik Jensenip (S) naapisimareeraalu taama isummerpoq. Taamaakkaluartoq Jess G. Berthelsenip ajornartorsiut nassuerutigaa.
AAMMA ATUARUK Erik Jensenip nunanit allaneersunik sulisoqarnissaq oqilisaanniarpaa
- Avataaniit sulisussanik tikisitsisarneq nuannarinngilara piviusorli tassaavoq sulisussaaleqineq atuummat.
Danmarkimiit sulisussaqannginneq
SIK-mi siulittaasup sulisitsisut ajornartorsiutaat paasilluarsinnaavai aaqqiissullu fast-track itigartivissorsinnaanngilaa.
- Immaqa periaatsit ilagisinnaavaat. Danmarkimit sulisussarsiniarneq iluaqutaanngilaq, aamma tassani sanaartornermi sulisussaaleqigamik. Kisianni nunami maani isumaqatigiissutit ataqqineqarnissaat piumasarineqartariaqarpoq oqarpoq.
AAMMA ATUARUK Nunanit allaneersut suliartornissaannut suliat sukkanerunissaat sanaartornermut iluaqutaassaaq
Sanaartornerup iluanittaaq Europap kangianiit sulisussanik tikisitsisarnerup ajornaatsuinnaannginnera misigaat, qaammatit 3-5 tungaanut sulisinnaanermik akuersissutinik utaqqeqqaartariaqartaramik. Sanaartornermi sulisitsisut sulisut nikerarneri misigisarpaat, sulisitsisunut allanut pitsaanerusunik atugaqarumallutik nuuginnarsinnaasarmata.
Sulisut sulisitsuminnut ilumoortuunnginnerat ajornartorsiutaavoq
Jess G Berthelsenip nalunngilluarpaa sulisitsisut sulisuminnik ikittuinnaasunik ullormiit ullormut suliffeqarfinnut allanut suliartoriaannaanerat sulisunik annaasaqaatigisaraat.
- Sulisitsisut paasilluarsinnaavakka sulianik tigooraanissaminnut pilersaarusiorniarnerminnut ajalusooqqasinnaasarmata, tassami sulisut nikerartuartillugit ullormiit ullormut qaammatiniluunniit aggersuni qanoq sulisoqartigissanertik nalusarmassuk, taama oqarpoq.
Avataaniilli sulisunik tikisitsinermiit Nunatsinni inuusuttut sulisinnaalersinnissaannut suliniarusunnerulluni Jess G Bethelsen KNR-imut naqissuserumavaa.
