Nunanit allaneersut suliartornissaannut suliat sukkanerunissaat sanaartornermut iluaqutaassaaq
Nunanit allaneersut suliartornissaannut suliat sukkanerunissaannik aaqqissuussineq sanaartugassanik sulisitsisoqarfimmi Permagreenimi nuannaarutigineqarpoq.
- Inuiaqatigiinnut iluaqutaasussavoq, Permagreenimi pisortaq Preben Kold Larsen oqarpoq.
AAMMA ATUARUK Nunanit allaneersut suliartornissaannut suliat sukkanerunissaat politikerip kissaatigaa
Taassuma erseqqissarpaa sulisussaaleqineq ukiuni kingullermi tallimani annertusiartuinnarsimasoq.
- Naammattunik sulisussaqanngilaq, ilinniarsimasullu ikippallaarput, oqarpoq.
Sanaartortitsinermik suliaqarfik tamarmi sulisussaaleqivoq
Suliffeqarfimmi sulisussanik amigaateqartuartumi pisortaanermi saniatigut Preben Kold Larsen aamma Sulisitsisut Grønlands Erhvervip ataani Sanaartornermi suliallit peqatigiiffianni siulittaasuuvoq. Suliffeqarfianilu ajornartorsiut takornartaanngilaq.
- Sanaartortitsinermik suliaqarfimmi nalinginnaasumik ajornartorsiutaavoq. Pingaartumik Nuummi immaqa aamma annikinnerusumik Ilulissani, oqarpoq.
Nunanit allaneersut suliartornissaannut suliat sukkanerunissaat
Nunanit allaneersut suliartornissaannut suliat sukkanerunissaatigut suliffeqarfiiit sulisunik nunanit allaneersunik immikkut piginnaasalinnik sukkanerusumik ajornannginnerusumillu tikisitsisinnaalissapput.
Savalimmiuni taamatut aaqqississuussineq suliffissaaleqisut qanoq amerlatigineri naapertorlugit malittarisassaliuunneqartarpoq.
Suliffeqarfiit piumasaqaatit assigiinngitsut naammassisinnaagunikkit, soorlu akissarsiaqarnermut tunngasut, nunanit allaneersunik tikisitsisinnaanissaminut siumoortumik akuerineqareersinnaasarput.
Nunamiissinnaanermut/sulisinnaanermut akuersissut pillugu suliap ingerlanneqarnerani sulisussap sulinermini aallartissinnaneranik tamanna kinguneqassaaq.
Tigusiffik: Naalakkersuisut
Permagreen sulisussarsioruni siullermik sivikinnerpaamik sapaatip akunneri marluk maanimiunik sulisussarsioqqaassaaq. Kingornatigut nunanit allaneersunit sulisoqarnissamut akuersissummik kommunimut qinnuteqassaaq. Taava sulisussarsiussaaq, pappiararsornerli utaqqineqaqqaartariaqarpoq, ajornaatsuinnaanerlu ajorpoq, Preben Kold Larsen oqaluttuarpoq.
- Qaammatit sisamat qangiuppata maani sulisussarsisinnaannginneq peqqutigalugu assersuutigalugu Polenimeersumik atorfissaqartitsilersinnaanera siumut ilisimariissallugu ajornaqaaq. Taava taanna isumaqatigiissuteqarfigissavara, taassumalu qaammatit sisamat-tallimat utaqqeqqaarluni aallarsinnaanissani akuerissavaa. Ajornarluinnarpoq, pisortaq oqarpoq .
Sulisussaaleqinaqaaq
Tassami Danmarkimi nunat allamiut pillugit aqutsisoqarfiup suliaq ataaseq qaammatini pingasuni suliarisarpaa. Qaavatigut suliamik ingerlatsineq ilanngunneqassaaq. Sulisunik nunat avannarlermiunik tikisitsinissaq pisariinneruvoq, kisianni Permagreenip pisortaa naapertorlugu Danmarkimit imaluunniit nunanit avannarliit ilaannit allanit piffissami sivisuumi maanniissinnaasunik sulisoqarsinnaanissaq maanimiunik sulisoqarniarnertulli ajornakusoortigaaq. Taamaattumik nunarsuup ilaanut allamut qiviartariaqarpugut.
- Ingammik Europamit Europallu kangianit sulisussarserusuppugut, kisianni allaffissornaqaaq, tassami Danmarkimi nunat allamiut pillugit aqutsisoqarfik aqqusaartariaqaratsigu. Akuersissummik pissarsissagutta qaammatit pingasuniit tallimanut atortariaqarpavut, oqarpoq.
LÆS OGSÅ Sulisussat amigaatigineqartut aaqqiiviginisaanut suleqatigiittoqartariaqarpoq
Sulisut nunanit allaneersut suliartornissannut suliat sukkanerunissat suliffeqarfeqarfiup sulisunut sulisitsusunullu unammillerluarnerusinnaanerannik kinguneqassasoq pisortaq neriuppoq.
- Taanna eqqortutuaavoq. Siullermik sulisussat amigaatigisavut pissarsiarisinnaalissagatsigit, tassami amigaateqaratta, aappassaanilli neriunartumik ataatsimut isigalugu aamma pitsaanerusumik sanaartukkatsinnik naammassisaqarsinnaassagatta. Tassa inuiaqatigiinnut iluaqutaassaaq. Sukkanerusumik sanaartorsinnaanerput neriuutigaarput, suliassat amerlanerusut tigusinnaalissavavut, tassami suliassat naammattunnguit utaqqipput, Preben Kold Larsen naggasiivoq.
