Erik Jensenip nunanit allaneersunik sulisoqarnissaq oqilisaanniarpaa
Suliffeqarfeqarfiup ilarujussuani ilinniarsimasunik sulisussaaleqisoqarpoq nunatsinnilu naammattunik sulisussarsisinnanatik. Nunat avannarliit avataanniit Europami sulisussarsiniaraanni sulianik ingerlatsineq qaammatit pingasuniit tallimanut sivisussuseqartarpoq, ilaannikkullu suli sivisunerusarluni, Naalakkersuisoq Erik Jensen (S).
AAMMA ATUARUK Nunanit allaneersut suliartornissaannut suliat sukkanerunissaat politikerip kissaatigaa
Iliuuseqarfigisariaqarpoq, tassami nunatta aningaasaqarniarneranut sulisoqarneranullu ajunngitsumik massakkut ingerlaneq kigaalaqusersinnaammagu.
- Nunanit allaneersut suliartornissaannut suliat sukkanerunissaannik aaqqissuusserusunnitsinnut peqqutaavoq massakkorpiaq siumukarneq attatiinnarusukkatsigu. Nunatsinni atorfiit inuttassaqanngitsut sukkanerpaamik inuttalerneqarnissaat periarfissaqarfigerusupparput, Erik Jensen (S) oqarpoq.
Siumoortumik akuersissuteqarnerup tamanna oqilisassavaa
Taamaattumik nunanit allaneersut suliartornissaannut suliat sukkanerunissaannik aaqqissuussinermik taaneqartartoq pillugu Danmarkimi udlændinge -og integrationsminister (nunanit allaneersunut ilanngutitaanermullu ministeri) Mattias Tesfaye sapaatip akunnera kingulleq ataatsimeeqatigaa. Aaqqissuussineq Savalimmiuni atuutilereerpoq.
AAMMA ATUARUK Royal Greenlandip nunaqavissunik sulisussarsiniarneq ajornartorsiutigigaa
Nunatsinni suliffissaaleqisut qanoq amerlatiginerat tunngavigalugu aamma aaqqissuussineq atorneqassappat piumasaqaatit assigiinngitsut suliffeqarfiit naammassisassaat eqqarsaatigalugit malittarisassiortoqassaaq. Siumoortumik akuersissuteqarneq ilaatigut sulisussanik ingerlaannartumik tikisitsisinnaanermik periarfissiissaaq, taakkulu sulisinnaanissamut akuersissummik pissarsinissartik utaqqiitigalugu sulilereersinnaassapput. Taamaanneranili nunaqavissut suliffissaqannginnerulernissaat annilaanngatissaanngilaq, Erik Jensenip erseqqissarpaa.
- Inatsisartut inatsisaanni allassimareerpoq atorfinitsitsiniarnermi nunaqavissut siulliunneqartassasut. Aatsaat nunaqavissunikpissaqanngikkaanni nunanit allanit tikisitsisoqarsinnaavoq, oqarpoq.
Eqqortumik aaqqissuussiniaraanni suliffeqarfeqarfimmi akuusut suleqatigisariaqarput
Aaqqissuussinerup nunatsinnut nalequussarnissaa Erik Jensenip siunniuppaa, nunatsinnili akuerineqassappat qanoq isikkoqassanersoq suli oqaatigisinnaanngilaa.
- Taanna politikikkut oqallisigeqqaassavarput aammalu suliffeqarfeqarfimmi akuusut ilanngullugit. Qanorpiaq pisoqassanersoq uterfigiumaarparput, Erik Jensen oqarpoq.
Danskit ministeriannik ataatsimeeqateqarnermi atorfilittat isumaqatigiissuteqarfigineqarput qaninnerusumik attaveqaqatigiittoqassasoq, taamaalilluni pissutsit qanorpiaq aaqqiivigineqarsinnaanerinik sulineq aallartinneqarsinnaassammat.
AAMMA ATUARUK Avataanit suliartortunut inatsit sukaterneqassaaq
