Avannaani timmisartukkut ilaasoq pakatsisoq: - Neriuppunga allanngortoqarumaartoq
Bella Jensen Kullorsuarmut ilaquttaminut juullisioriarniarluni aallarnissaminut decembarip 20-annut utaqqisariaqassaaq.
Pilersaarutit malillugit Ilulissanit Kullorsuarmut decembarip arfineq pingajuanni angalasussaagaluarput, paasitinneqarporli silap ajornera pissutigalugu angalanissaat kinguartinneqartoq.
Bella Jensen Ilulissanit Upernavimmut decembarip 10-anni tikippoq, ullunik marlunnik kinguaattoorluni. Upernavimmut tikimmat ilisimatinneqarpoq helikopteri meeqqanilu Kullorsuarmut ilaaffissaat ajoquteqarmat aallariaqqissinnaanngitsut. Decembarip 20-annut Upernavimmeeqqartariaqartussanngorput – juulliararnissaanut ullut sisamaannanngortut.
Bella Jensen kinguaattooqqanini iluarinagu KNR-imut saaffiginnippoq.
- Sila pissutigalugu kinguaattoortoqarsinnaammat paasisinnaalluakutsoorpara. Paasisinnaanngilarali teknikikkut ajutoortoqaraangat, angallassissutinik allanik angallassisoqarsinnaannginnera, teknikikkut ajutoorsimaneq pissutigalugu utaqqititsiinnarani, Bella Jensen KNR-imut oqaluttuarpoq.
Angallassiniarnermik aatsaat kinguaatoortoqalinngilaq
Bella Jensen Ilulissani ilinniartuuvoq, meeqqani najugaqatigalugit. Bella Jensen Air Greenlandimit 2017-imi assingusumik ilungersunartumik nalaataqartinneqarpoq. Kullorsuarmit Ilulissanukartussaalluni ilungersornartorsiortinneqarluni.
- Taamani allatut pisoqarpoq. Kullorsuarmi taamani juullisioreerluta Ilulissanut angerlartussaavugut. Timmisartumut ilaasinnaannginnatta helikopterimut S-61-imut ilaatinneqarpugut, Bella Jensen KNR-imut oqarpoq.
- Ingerlaqqinnissatsinnut allatut maannakkut periarfissinneqanngilagut.
Sila aamma silap qaamarnga helikopterip angallassisinnaaneranut apeqqutaasarpoq.
Helikopterimik angallassiniarnerup ajornera ilaasorpassuarnut sunniuteqarpoq Bella Jensenip ilungersunartumik maannakkut nalaataa, ajornartorsiutaanera, nutaajunngilluinnarpoq.
KNR-ip Kullorsuarmi qulimiguulimik angallanneq pillugu marloriarluni 2018-imi allaaserivaa.
Siulleq angajoqqaaq meerarlu Kullorsuarmiit Upernaviup napparsimavianut apuunneq ajuleqqasut pillugu KNR allaaserinnippoq, Meeraq napparsimavimmi misissortinniarluni aallarneq ajulersimapput qulimiguulik teknikkikkut ajoquteqarmat.
Piffissaq assingani Kullorsuarmi atuarfik qulimiguulimik angallanneq pakatsissutigisimavaat. Atuarfik sulisunik sivisuumik amigarsimavoq, ilinniartitsisut Kullorsuarmut tikinneq ajulersimammata.
KNR Upernaviup eqqaani qulimiguulimmik angallassinerup pitsannginnerujussua pillugu 2020-mi allaaserisaqarpoq. Kullorsuarmut piffissami tassani qulimiguulimmik ulluni 45-ni angallassisoqannginnera allaaseralugu.
Air Greenland taamani nassuiaavoq sila ajornera peqqutigalugu angallassisoqarsinnaasimanngitsoq, kiisalu sila taarpallaarluni allatut ajornartumik angallassineq unikkallartariaqartoq, timmisoqarnissaata tungaanut.
Bella Jensenilli isumaqarpoq angallannerup ilungersunartorsiorfiani angallassissutaasinnaasunik allanik periarfissiilluni neqerooruteqartitsisoqartariaqartoq.
- Neriuppunga arlaannik iliuuseqartoqarumaartoq. Avannaanni angallassissutaasinnaasut, helikopteriinnaanngitsut, amigaataagamik. Qanoruna Air Greenland angallassissutinik allanik amerlasuunik, soorlu angallatinik assigisaannillu anginerulaartunik aaqqissuussilluni periarfissiigili.
Bella Jensenip isornartorsiuinera KNR-imit Air Greenlandimut saqqummiupparput, taakkulu Bella Jensenip pakatsinera paasisinnaalluarpaat, nunattalu avannaani akunnerit timmisartuussiffiusinnaasut aqqanerniit tallimap tungaanut taamaallaat timmisartuussiffigineqarsinnaapput.
Bella Jensenip siusinnerusukkut oqaatigeriigai – silap ajornera, teknikkikkullu ajutoortoqarnera - kinguaattoornernut peqqutaasut Air Greenlandip oqaatigaa. Sillimaniarnerlu peqqutigalugu angallassissutaasinnaasunik allanik atuisinnaanatik suliffeqarfiup ilanngullugu oqaatigaat.
