Angalasut sapaatit akunnerat sinnerlugu saperngusut: - Asulersuaq

Line Kristiansen Tasiilameersoq sulinerminut atatillugu ataatsimiigiarluni ulluni marlussuinnarni Nuummiittussaagaluarpoq.

Naatsorsuutigisaminilli sivisunerungaatsiartumik Nuummiittussanngorpoq.

Anorersuarnera sermernarsinnaaneranillu aarleqquteqarneq pissutigalugu Air Greenland Tunumut Tunumiillu ulluni arfineq-pingasuni angallassisinnaasimanngilaq. Aallarfissatut pilersaarutit tulleriiaarlutik taamaatiinnarneqaqattaarmata Line Kristiansenimik saperngutitsivoq.

- Silassaq misissoreerlugu ulluni arlalinni anorersuarnissaa nalunngereerparput. Marlunngormat nutaamik bilitsilerpaatigut, kisianni tamatta nalunngilarput timmisartuunneqarsinnaanata. Sapaatit akunnerata ingerlanerani aamma arfininngornermut bilitsilerneqarpugut, taannali taamaatinneqartoq tallimanngornermi paasitinneqarpugut, oqarpoq.

Air Greenland angallassinissamut atatillugu pilersaarusiorluartannginnera Line Kristiansenip eqqarsarnartoqarteqaa. 

Ullup aallarfissap siulliup aqaguani Kulusumut aallarsimasinnaagaluarpugut, kisianni sapaatit akunnerata ulluanut allamut inissinneqarpoq, uffa nalunarunnaareersoq ulloq taanna angallaviusinnaanngitsoq.

Taamaammat misigaaq angalatitseqatigiiffiup Nunatta Kangianut angallassinerit tunulliuttarai.

- Tasiilap silaa sapaatit akunnerata naanerani kingullermi sapaammi angallavissaqqippoq, tamatta takusinnaavarput timmisartuunneqarsinnaagaluarluta. Ulloq taanna angerlamut timmisartuussimasinnaagaluarpaatigut, ajornartorsiutaammi aamma  ikinnerusimassagaluarput.

Allat taava utaqqisinneqarsimassagaluarput, ullunili taakkunani Kalaallit Nunaata sinnerani aamma silaqqissorsuuvoq. Line Kristiansenili Nuummiiginnartariaqarpoq. Air Greenlandip akiligaanik.

- Asulersuaq maaniiginnartinniarluta nukinnik atuilussinnartarput, uffa Tasiilamut uternissatsinnut atatillugu suliniuteqarnerulaarunik imminnut oqinnerussasoq, oqarpoq.

Kinguaattoornerit akisuut

Ilaasuussaq alla utaqqikatattoq tassaavoq Egon Poulsen Tasiilameersoq.

Nuummiinnera sivikitsuinnaasussaagaluartoq sivitsoruuttoorpoq.

- Pilersaarutit malillugit ulluni pingasuinnarni Nuummiittussaagaluarpunga, ullulli maanna aqqaneq-marlunngorpakka. Ullut maaniiffissakka ullunik qulingiluanik sipporlugit, oqarpoq.

Egon Poulsen Nuummiit aallarsinnaajunaaqqanermini suliffiutimini sulisinnaannginnini aningaasanik annaasaqassutigingaatsiarpaa. Assi © : Johansinnguaq Olsen, KNR

Sippuinerillu Egon Poulsenimut akisoqaat.

- Uannut tamanna akisuvoq. Suliffiga qimaqqavara, taavalu saniatigut namminersortuullunga aamma taanna uannut naleqarpoq ullut taakkua qimaqqanerat.

Tamannami isumaqarpoq, pisuussutiginngisaminik sulinngiffeqarnini nammineq kaasarfimminit akilertussanngorpaa, taxanillu angallassinnginnami aamma annaasaqaatigalugit.

Taannalu isumaqarpoq, Tunumiuussagaanni angalalluni kinguaattoornissaq naatsorsuutigisariaqartoq.

Line Kristiansenitulli Egon Poulsen misigivoq Air Greenlandip Nunatta Kangiamiut angallannissaat pingaartutut isiginngikkaat.

- Isumaqarpunga aaqqiivigisariaqaraat Air Greenlandikkut. Qularinngilluinnarpara tunuminngaanniit angalaniarneq ima akisutigaaq allaat allaninngaanniit akiliinerusarluta, kisianni tamatigut kingulliunneqartuaannarluta malugiuaannarparput, oqarpoq.

Air Greenland: Pakatsinerit paasinarput

Silaannakkut angallassinissanik pilersaarutit arlallit silarlunneranik aamma sermernarnissaannik arlerisaarutinik pissuteqarput. Taama Air Greenland ilisimatitsivoq. Tusagassiinermut pisortaq Inga Dora G. Markussen ilaasussat pakatsissuteqarnerannik paasinnipoq.

- Tusaasinnaasarparput ilaatigut Kangianinngaanniit naammagittaalliornerit, paasinartumik, kisianni pitsannguiniarluta iliuuseqangaatsiarpugut, oqarpoq.

Aamma uggoraa, ilaasussat allat Line Kristiansenitut Egon Poulsenitullu tunulliunneqartutut misigisimassappata.

- Tusaasinnaasarparput erloqinartoq. Angalanissanulli pilersaarutit maani malinniarneqartarput.

Avammut tusagassiinermut Air Greenlandimi pisortaq Inga Dora G. Markussen angalasussat pakatsinerannik paasinnippoq. Kisianni Tunumi mittarfiit immikkuullarissuupput, oqarpoq. Assi © : Henriette Simonsen, KNR

Air Greenlandip ullormut angalasussatut pilersaarutit sapinngisamik salliutillugit naammassiniaqqaartaramigit, immikkut ittumik timmisartuussinissaq aatsaat tunulliuttarpaat. Silassaq aamma nalilersuinerminni qimerlooqqaartarpaat.

- Takusinnaagaangatsigu silarluttussaq siumut isigisarpugut, allaat 48 tiimit siumut isigisarluta, takusinnaalerutsigu silassaq imaalereersoq taava siusinnerusukkut taamaatitsiniartarpugut. Ilaannikkut upperisinnaasarparput sila silagissuataassappat pipallattumik timmisartuussisinnaassalluta. Angalasussat artukkernaveersaarneqartarput, oqarpoq nangillunilu.

- Nunatta Kangiani pissutsit allaapput, Kulusumi mittarfik immikkuullarissuuvoq, sillimaffigisariaqarfiulluni. Tasiilami Kulusumilu silap unerisimanngittarnera aamma nunataa - timmisartoqarfiup ilusaa - ilanngullugu isigigaanni una timmisartuussisarnerni immikkuullarissuseqarpoq. Taamaammat pilersaarusioruminaattartoq oqaatigaa.

Inga Dora G. Markussen oqarpoq, Nuup Kulusuullu akornanni ataatsimik ippassaq timmisartuussillutik ullumilu marlunnik timmisartuussissamaarlutik.