Kulusummi mittarfik pillugu isornartorsiuisoqaqqittoq: Sermernarnera peqqutaalluni siorna arfinileriarluni taamaatitsiinnartoqarpoq
Tasiilami illup iluani isikkamik arsaannermi pissartanngorniutivittoqarnerani, arsaattartut 90-it sila peqqutaalluni angerlamut apuunnaveerput.
Kulusummiillu Kulusummut angallassinissanik taamaatitsiinnartarneq takornartaanngitsoq – Nuummersoq Kirstine Davidsen oqarpoq.
- Kommunimi isumaginninnerup iluani atorfeqarama tunumut angalakulasarpunga. Kisianni Tasiilami kisimik suliassaqarneq ajorpugut, Nuummi, Paamiuni allanilu suliassaqartaqaagut, Kirstine Davidsen oqarpoq.
- Kisianni Tasiilaliartussaasimagaangama pilersaarusiorsinnaaneq naatsorsoruminaattarpoq piffissaq eqqorlugu tikinnissaq naatsorsuutaajuaannarneq ajormat.
AAMMA ATUARUK Arsartut 90-it missaanniittut Tasiilami pissartanngorniunnerup kingorna aallarnaveeqqasut: Angerlarsileriartorput
Kulusuup mittarfiani sermiaateqannginnera angallanniarnikkut ajornartorsiutaasarpoq. Taamaammallu Dash-8 sermersuaq qulaallugu Kulusuliarniaraangami tamatigut iluatsittuaannanngilaq, timmisartummi sului sermersimasinnaasarput. Tassalu taamatut nalaassinerup kingunerisaanik Kulusummut timmisartuussinissaraluit siorna arfinillit taamaatiinnarneqartariaqarsimapput.
Nunatsinni mittarfiit tallimat Nuuk, Kangerlussuaq, Maniitsoq, Ilulissat Sisimiullu Air Greenlandimiit timmisartumut sermiaateqartinneqarput.
Mittarfinni sermiaateqarniaraanni akikinngilaq. Sermiaatit 2 millionit koruuniniit 6 millionit koruunit tungaanut akeqartut, Air Greenlandimi nunami ingerlatsinermi aqutsisoq (Ground operation manager), Niels Christian Jensen KNR-imut nassuiaavoq.
Ilaasartut akilissavaat
Timmisartoq sermiaammik imerpalasumik seqqarsarneqartarpoq. Dash-8 sermiiarniaraanni sermiaat 250 – 350 liiteri atorneqartarpoq, taannalu 8.000-9.000 koruuninik akeqartarpoq.
- Sermiaanermut atortorissaarut ukiumut qasseriarluni atorfissaqartinneqartarnersoq, tamatumalu ingerlannissaa qanoq akeqarnersoq akerlianillu timmisartuussinissat qassit taamaatiinnartarnerigut misissortarpagut. Kulusummi sermiiaanermut atortorissaaruteqaraluarpat timmisartuussinigut siorna arfinilinnik amerlanerusinnaagaluartut misissuinitta takutippaa, Niels Christian Jensen oqarpoq.
- Atortorissaaruteqarnissamut ilaasartugut aningaasanik kisimik aallerfigisinnaavagut – taamaammat ukioq naallugu akit qaffangaatsiassapput. Arfinileriarluta taamaatitsinigut amerlavallaarput – kisianni sermiaanermut atortorissaarummut aningaasartuutit matussuserneqassagunik tamanna akisunerulissaaq. Taamaammat kinguaattoortitserusunnerussaagut.
Akissulli taanna Kirstine Davidsenip naammaginngilaa.
AAMMA ATUARUK Kulusummiit ingerlariaqqinnaveertut erloqisut: Air Greenland iliuusai naammanngilluinnarput
- Aap akisuppat paasisinnaavara, kisianni uagut ilaasuusugut toqqissisimanissarput Air Greenlandip eqqarsaatigerusunnginnerpaa? Assersuutigalugu qaammat kingulleq aflyseratta Air Greenlandimit sumiiffissaarunneqarpugut, tassani Kulusuup sermiaateqannginnera peqqutaalluni aallanngitsoorpugut.
Taassuma marsimi Kulusummiit Nuummut ingerlariaqqinnaveeramik Kulusuup akunnittarfiani ilaasut tamarmik inissaqartinneqannginnerat eqqaamalluarpaa.
- Neriuppunga siunissami qaninnerpaami Air Greenlandip aaqqinniarumaaraa. Tunu kalaallit nunaanut atammat angallannermik pitsaasumik uatsituulli kitaaniittutut atugaqassappata angusaqaqqunaqaat.
Qulimiguulik angalasinnaanavianngilaq
Kulusummi sermiaateqalernavianngilaq.
- Timmisartuussiffiungaatsiartumi isumatsialaavoq. Mittarfinni timmisartuussiviuallaanngitsuni peqarnissaa isumassaqarpallaanngilaq.
- Oqarutta Kulusummi sermiiaateqartoq, Kulusummiilli Tasiilamut qulimiguulimmik ingerlasoqartarpoq.
- Taamaammat sermernarnerani ilaasussat Tasiilamut Tasiilamiilluunniit aamma aallarsinnaanavianngillat. Taamaammat Kulusuk katersuuffiulissaaq.
Timmisartup naalagaata timmisartoq sermeqarnersoq misissortarpaa, sermeqaraangallu angalanissaraluarmik taamaatitsisarluni. Sermeqanngippata ilaasut issimatiinnarlugit sermiaamik seqqarsaasarput.
Assi: Air Greenland
Silap qanoq issitsiginera apeqqutaalluni sermiaat sunniunniartarpoq, iluaqutaaneralu minutsialuinnaasarluni. Timmisartoq timmitilluni sului sermerneq ajorput - mittarfimmili missimatilluni sermertarluni.
- Timmisartoq sermersimanersoq aallannginnitsinni paasiuaannarparput, sermersimagaangallu sermeerunnissaata tungaanut uninngasarpugut, Greenlandimi nunami ingerlatsinermi aqutsisoq oqarpoq.