Arsartut 90-it missaanniittut Tasiilami pissartanngorniunnerup kingorna aallarnaveeqqasut: Angerlarsileriartorput
Inuusuttut 15-it inorlugit ukiullik futsalimik nunatsinni pissartanngorniunnerisa kingorna inuusuttut arsartartut, sungiusaasui angallassisuilu illoqarfigisaminnut apriilip 16-ianni arfininngornermi aallartussaagaluarput.
Taamaattoqanngilarli. Tunumi nuannersumik misigisaqaraluarlutik tamanna naggaserneqarnerluppoq, Tunumiimmi angalasussarpassuit Air Greenlandip timmisartuisa kinguaattoornerat taamaatiinnarneqarnerallu nalaappaat. Arsartartut, sungiusaasut angallasseqataasullu 90-it missaanniipput.
B-67-ip U15-inut sungiusaasuata Nuummut siusinnerpaamik tallimanngorpat aallarsinnaassallutik nassuiaatigaa.
Assi: John Pedersen.
Taanna inuusuttorpassuit arsartartut peqatigalugit Tasiilamit aallarneq ajuleqqavoq.
- Neriuppugut neriukkaluarpugut aamma meerartagut aamma apuukkusuttukassaagamik holdit tamarmik, John Pedersen KNR-imut oqarpoq.
- Angalaneq una akissarsiutiginngilarput kajummisutsimik suliaqartuugatta arlaatigut iluanaaruteqarfiginngilarput. Taava sulinissagut annaassavagut taamaasilluta immaqalu feeriassagut pilersaarutaanngitsumik makkununnga atortariaqarlugit kinguartitsisaqattaarnermi.
Tasiilami timersoqatigiiffik ajuusaartoq
B-67-imi sungiusaasup inuusuttut angerlarsileriartortut angajoqqaaminnullu angerlarusuttut oqaatigaa.
- Angajulliit 15-liisussat, taava nukarliit 13-liisussat 13-illu ukiullik, malunnalaarput taakku nukanganertai taakku angerlarsilaartartut uku angajullerumaat ernumanarpallaanngikkaluarput kisianni aamma meerartatsinnut qasunarpoq taamatut apuuneq ajulerluni apuukkusukkaluarlutik, John Pedersen oqarpoq.
Tunumi unammiuaarnernik aaqqissuussisoqarnera qaqutigoortuuvoq. Tunu ungasippoq, timmisartumullu billetsit akisullutik.
Taamaammat Tasiilami arsartartut peqatigiiffiata, ATA-p naak aaqqissuussineq iluatsilluaraluartoq inuusuttut misigisaasa naggasernerlunneqarnerat ajuusaarutigaa.
- Aaqqissuussaq tamakkiisumik isiginiassagaanni unammersuarneq ATA-mi naliliinitsinni ajunngitsumik ingerlavoq angallanniarneq taamaallaat ajornartorsiutigisimavarput. Unammersuarnerlu naammassereeraluartoq suli ajornartorsiutigivarput Air Greenland aflyseqattaarnera peqqutaalluni, Tasiilami ATA-mit, Aron Jonathansen oqarpoq.
- Air Greenlandi salliussisannginnera maani kangiani taanna uggornaqaaq taamatut alla pinnginnamikku ilaa kitaani angallanniarneq, taavalu sila peqqutaatillugu maanga angalaniarneq silamik peqqutaatillugu unitsitsiinnartarneq ullut sioqqullugit ilaa taanna pissusissamisoorsorinngilara.
Mittarfimmi sermiiaateqanngitsoq
Air Greenlandip oqarnera naapertorlugu silap qanoq innera Tasiilamut angalanissamut pilersaarutiminnut ajoqutaavoq. Tamatuma saniatigut Tasiilamut ingerlaqqinnissamut mittarfimmi tassa Kulusummi ”de-icingmaskine”-mik tassa timmisartunut sermiiaammik atortorissaaruteqanngilaq.
Air Greenlandimit Dash-8 sermersuaq qulaallugu Kulusummut mikkaangamik sului sermersimasinnaasarput.
Tamanna tusagassiuutinut avammut attaveqartartoq, Inga Dóra Markussen taama nassuiaavoq.
- Taamaatitsinermut silap pitsaannginnera, anoraasuasarneq aamma sermersoorsinnaaneq pissutaapput. Kulusuup Mittarfiani Tasiilallu qulimiguulinnut mittarfiani sermiiaateqannginnera pissutigalugu timmisartuussinissaq isumannaatsuunngilaq.
Isikkamik arsartartorpassuit, sungiusaasui angallassisuilu Hotel Tasiilamut inissinneqarput.
