Angut universitetit pitsaanerpaat ilaanni aallaasersorsimasutut pasineqartoq toqungasoq siumorneqartoq

Angut Amerikami Rhode Islandimi Brown universitymi arfininngormat aallaasersorsimasutut pasineqartoq danskit nalunaaqutaat malillugu sisamanngornerup unnuaani toqungasoq nassaarineqarpoq.

Tusagassiuutit arlallit naapertorlugit illoqarfimmi Providencemi, Brown universityp inissisimaffiani, politiit pisortaat Oscar Perez tusagassiortunik katersortitsinermi taama oqarpoq.

- Unnummut (sisamanngornermi unnukkut, aaqq.) imminut toquppoq, nutaarsiassaqartitsivik AFP naapertorlugu taanna oqarpoq.

Pasineqartoq angutaavoq 48-nik ukiulik Portugalimiu. Kingullermik Miamimi Floridamiittumi najugaqarsimasoq, CBS News allappoq. Siornatigut universitetimi ilinniartuusimavoq.

Angut illoqarfimmi Salemimi New Hampshiremiittumi siumorneqartoq, tassanilu atuagaasivik aallaasillu marluk nassaarineqartut, Rhode Islandimi inatsisinik atortitsinermut ministeri Peter Neronha tusagassiortunik katersortitsinermi oqarpoq.
Brown Universitymi aallaasersortoqarnerata kingorna ullut marluk qaangiummata universitetimi Massachusetts Institute of Technologymi (MIT) professori angerlarsimaffimmini Brooklinemiittumi, Providencemit 80 kilometerisut ungasitsigisumiittumi, aallaaneqarluni toqutaavoq.

Sooq taamaaliornersoq ilisimaneqanngitsoq

Portugalimiu 48-nik ukiulik maanna toqusoq aamma professorimik toqutsisimasutut pasineqarpoq.

Leah B. Foley, naalagaaffiup Massachusettsip eqqartuussissuserisua, tallimanngormat ullaakkut Fox News naapertorlugu taama ilisimatitsivoq.

Toqutsisutut pasineqartoq professorilu toqutaasoq 1995-imiit 2000-imut Portugalimi ilinniaqatigiissimasut, Foley oqaluttuarpoq.

Oqartussaasut aallaasersortoqarneranut suna pissutaanersoq tallimanngornermi ullaakkut ilisimanngilaat.

Angut universitetit pitsaanerpaat ilaannut iserluni misilitsittoqarnerata nalaani arfininngormat aallaasersormat ilinniartut marluk toqupput qulingiluallu ikilerneqarlutik. Tamatuma kingorna sumiiffimmit qimaavoq.

Aallaasersortoqarnerata kinguninngua angut 20-t sinnerlugit ukiulik politiinit tigusarineqarpoq. Pisumut attuumassuteqanngitsoq nalilerneqarmat aallaasersortoqarnerata aqaguani iperagaasimavoq.

Aallaasersortoqarnerata kingorna ulluni tulliuttuni politiit uppernarsaatissanik peqanngillat, pisortatigoortumillu pasisaqartoqanngilaq.

Pasineqartoq aallaasersortoqarnerata kingorna universitetip ungasinngisaani aqqusinikkut pisuinnaq qimaasimasoq illoqarfimmi Providencemi, Brown Universityp inissisimaffiani, misissueqqissaartartut nalunaarput.

/ritzau/