Avalak paaqqinnittarfiit ajornartorsiutigineqarnerannut aaqqiissutissaqarpoq

Kalaallit nunani allani ilinniartut ilinniareernerminni angerlartussanngoraangamik qitornaminnut paaqqinnittarfissanik pissarsiniartarnerat ajornakusoortupilussuusartoq ilisimaneqarpoq. Ilinniartunut ajornartorsiutaavoq angisooq, kalaallillu Danmarkimi ilinniartut peqatigiiffiat, Avalak, aaqqiissutissamik siunnersuutissaqarpoq.

Allattoq Peter Troelsen, Simon Uldum

septembarip 20-at 2013 10:09

Kalaallit ilinniartut Kalaallit Nunaanni paaqqinnittarfimmut qitornaminnik allatsitsisinissaannik periarfissiisoqarnissaa siunnersuutigaa. Maannakkummi taamaaliortoqarsinnaanngilaq, tamannalu pissutigalugu ilinniartut nunatsinnut utertut qitornaminnut paarsissussanik namminersortunik akisuupilussuarnillu atuisariaqartarput. Tamanna pissutigalugu ilinniartut ilinniakkaminnik naammassigaangamik ilarpassui angerlanngitsuuinnarnerannik kinguneqartarpoq.

- Danmarkimi ilinniartut immikkut pineqarnissaannik Avalak kissaateqanngilaq, Avalaalli siunnersuutigaa kalaallit ilinniartut qitornallit Kalaallit Nunaanni innuttaasut assingalugit meeqqanut paaqqinnittarfinnut utaqqisut allattorsimaffiinut allatsittalernissaat, taamaaliornikkummi angerlarnissaq toqqissimanarnerussaaq ilaqutariillu kalaallit qaffasissumik ilinniagaqarsimasut Kalaallit Nunaannut utertinnissaat pilerinarnerulersinneqassalluni, Avalammi siulittaasoq Hans Peder Kirkegaard oqarpoq.

Avalaap ajornartorsiut politikerinut ukiuni arlalinni saqqummiuttarsimavaa, ilinniartulli atugaannik pitsanngorsaataasinnaasunik maannamut iliuuseqartoqarsimanngilaq. Oqaatsit kusanartut anninneqartarput, iliuuseqartoqassananili.

- Avalaap akisussaaqataanini ilisimavaa aaqqiissuteqarnissamullu peqataarusulluni, alloriarnerillu siulliit ilagisinnaavaat kalaallit ilinniartut Kalaallit Nunaanni meeqqanik paaqqinnittarfinnut utaqqisut allattorsimaffiinut allatsittalersinnaanissaat akuerissallugu, ilinniartullu Danmarkimi ilinniakkaminnik naammassisaqarniarnerminni taamaaliornikkut Kalaallit Nunaanni innuttaasut allat assingalugit pineqarsinnaalissagaluarput, siulittaasoq oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.