Avaartaalluni puisinniarneq inerteqqutaasariaqartoq
- Puisinniarnermi avaartaatit atornissaat inerteqqutaalertariaqarpoq. Taama tupaallannartumik oqarpoq Canadap immikkoortuisa ilaani Newfoundlandimi premierministeri Danny Williams.
Avaartaaginnarluni puisinniarneq Newfoundlandimi ilaatigut atorneqartarpoq. Premierministerip oqaatigaa, avaartarlugit puisinniarneq toqutsissutitut pitsaasutut uppernarsineqareeraluartoq isigiuminaaqisoq. Williamsip ingammik ernummatigaa puisinniariaatsip taassuma, suliniaqatigiiffinnut puisinniarnermik inerteqquteqalersitsiniartunut iluaqutaaginnarsinnaanera.
Canadami avaartaalluni puisinniartarnerit nunani tamalaani isornartorsiorneqartorujussuupput. Isornartorsiuisuupput uumasunik illersuiniaqatigiiffiit politikerillu arlalippassuit. EU-parlamentimi ilaasortat amerlanerussuteqartut Canadamiut puisit amiutaannik Europamut eqqusseqqusiunnaarnissaq tapersersorpaat.
Nunatsinnissaaq puisinniariaaseq malinnaaffigeqqissaarneqarpoq. Nunatsinni naalakkersuisut Canadamiut puisit amiutaannik eqqussuineq ukiup aallartinnerani piffissami sivikitsumi inerteqqutigileraluarpaat. Puisinniariaaseq Inatsisartut ataatsimiilerpata oqaluuserineqassaaq.
